پاکستان فٹبال فیڈریشن نے فٹبال سنٹرل سٹوڈیو کا افتتاح کر دیا
لاہور (جاذب صدیقی)پاکستان فٹبال فیڈریشن نے سنٹرل سٹوڈیو متعارف کروادیا، فٹبال ہاؤس میں قائم کی جانے والی اس سہولت سے ایک ایسا تخلیقی اور پیشہ ورانہ ماحول بنایا گیا ہے جہاں فٹبال برادری کی دلچسپی کا بہترین مواد تیار کیا جاسکے گا۔
سٹوڈیو کی مدد سے شائقین، قومی ٹیم کے کھلاڑیوں، میڈیا کو ایک دوسرے سے جڑے رہنے کیلئے ایک مرکز میسر آئے گا، یہاں میڈیا انفلو انسرز کو اعلیٰ معیار کی ویڈیوز، انٹرویوز اور دیگر ڈیجیٹل میڈیا مواد تیار کرنے کی ہر ممکن سہولت فراہم ہوگی۔
لانچ کے موقع پر خطاب کرتے ہوئے پاکستان فٹبال فیڈریشن نارملائزیشن کمیٹی کے چیئرمین ہارون ملک نے کہا کہ فٹبال کنٹینٹ سٹوڈیو کھیل سے متعلق معاملات کو قابل رسائی اور پرکشش بنانے کے ہمارے وژن کی عکاسی کرتا ہے، ہم ایک ایسی جگہ فراہم کر رہے ہیں جہاں فٹبال کے پرجوش مداحوں، کھلاڑیوں، رپورٹرز کو پیشہ ورانہ ماحول ملے گا۔ پاکستان فٹبال میں یہ ایک نیا باب ہے،سٹوڈیو قومی ٹیم کے کھلاڑیوں کو بھی ایک پلیٹ فارم میسر آئے گا اور ان کے پرستاروں سے روابط مضبوط ہوں گے، کھلاڑی اپنے ذاتی سفر، تربیتی معمولات، اور پس پردہ مواد کا اشتراک کر سکیں گے، ان کے کیریئرز میں سٹوڈیو کا کردار اہم ہوگا۔
ہارون ملک نے کہا کہ ہم اپنے کھلاڑیوں کو اپنا کھیل میں سفر بتانے کے مواقع فراہم کریں گے، ہم اس بات کو یقینی بنانا چاہتے ہیں کہ یہ سٹوڈیو ہر اس شخص کیلئے گھر بن جائے جو پاکستان میں فٹبال کے بیانیے میں اپنا حصہ ڈالنا چاہتا ہے۔ چاہے یہ سنجیدہ تجزیہ یا تفریحی گفتگو کے ذریعے ہو، یہ سہولت ایک زیادہ متحرک اور جامع فٹبال کلچر بنانے میں مدد کرے گی۔
