آئینی ترمیم پر تمام سیاسی جماعتوں سے مشاورت کا سلسلہ جاری رہے گا، وزیراعظم
اسلام آباد (ڈیلی پاکستان آن لائن) وزیراعظم شہباز شریف نے کہا ہے کہ آئینی ترمیم کے معاملے پر تمام سیاسی جماعتوں سے مشاورت کا سلسلہ جاری رہے گا۔
وزیر اعظم شہباز شریف سے چیئرمین بلاول بھٹو زرداری کی قیادت میں پاکستان پیپلز پارٹی کے وفد نے ملاقات کی۔ جس میں پیپلز پارٹی کے وفد میں خورشید شاہ، سید نوید قمر، اور میئرکراچی مرتضیٰ وہاب شامل تھے۔
وزیراعظم نے ملاقات کے دوران معاشی اعشاریوں میں حالیہ بہتری کو خوش آئند قرار دیا۔ انہوں نے کہا کہ گزشتہ ماہ پہلی بار افراط زر کی شرح سنگل ڈیجیٹ میں آگئی، جبکہ سٹیٹ بینک نے پالیسی ریٹ میں 2 فیصد کمی کی جس سے پاکستانی معیشت پر سرمایہ کاروں کا اعتماد مزید مضبوط ہوا ہے۔
وزیراعظم نے بتایا کہ آج ہی پیٹرولیم مصنوعات کی قیمتوں میں کمی کی گئی ہے، جو عوام کو ریلیف پہنچانے کی ایک اور حکومتی کوشش ہے۔ انہوں نے اللہ تعالیٰ کا شکر ادا کیا کہ ملک میں بتدریج بہتری کے آثار پیدا ہو رہے ہیں۔
ملاقات میں مجوزہ آئینی ترمیم پر تفصیلی تبادلہ خیال ہوا۔ وزیراعظم نے کہا کہ آئینی ترمیم اور قانون سازی پارلیمنٹ کا اختیار ہے اور پارلیمنٹ بالادست ادارہ ہے۔ ان کا کہنا تھا کہ 24 کروڑ عوام نے پارلیمنٹ کو قانون سازی کا مینڈیٹ دیا ہے اور مجوزہ آئینی ترمیم کا مقصد عوام کو فوری اور موثر انصاف کی فراہمی ہے۔
وزیراعظم نے مزید کہا کہ آئینی ترمیم پر تمام سیاسی جماعتوں سے مشاورت کا سلسلہ جاری رہے گا اور بلاول بھٹو زرداری اور دیگر سینئر رہنما اس مشاورت میں اپنا کردار ادا کریں گے۔ ملاقات میں وفاقی وزراء اعظم نذیر تارڑ، احد خان چیمہ، اور عطاء اللہ تارڑ بھی موجود تھے۔
