خاتون اپنے عاشق کے ساتھ رنگے ہاتھوں پکڑی گئی، شوہر نے اسی سے شادی کروادی
نئی دہلی (ڈیلی پاکستان آن لائن) بھارتی ریاست اتر پردیش کے ضلع اعظم گڑھ میں پیش آنے والا ایک حیران کن واقعہ سوشل میڈیا پر زبردست توجہ کا مرکز بن گیا ہے۔ نیوز 18 کی رپورٹ کے مطابق اتراولیا تھانہ کے علاقے میں رہنے والے نوجوان امیت نشاد نے اپنی بیوی منجو کی شادی اس کے عاشق سنجے سے کروا دی۔ اس نے یہ قدم اس وقت اٹھایا جب اس نے دونوں کو قابلِ اعتراض حالت میں رنگے ہاتھوں پکڑا ۔
واقعہ اس وقت پیش آیا جب منجو کے سسر اور دیگر گھر والے گندم کی کٹائی کے بعد واپس آئے اور سنجے کو منجو کے ساتھ غیر مناسب حالت میں پایا۔ سسر نے فوراً اپنے بیٹے امیت کو اطلاع دی جس کے بعد گاؤں والوں کو بھی بلا لیا گیا اور پولیس کو طلب کیا گیا۔ امیت نشاد نے چھ ماہ قبل 2024 میں منجو سے شادی کی تھی۔ منجو شادی کے بعد بھی اپنے پرانے محبوب سنجے سے رابطے میں تھی۔
پولیس کے موقع پر پہنچنے کے بعد گاؤں میں پنچایت بلائی گئی، جہاں طویل بات چیت کے بعد امیت نے حیران کن فیصلہ لیتے ہوئے اپنی بیوی کی شادی اس کے عاشق سنجے سے کروانے کی اجازت دے دی۔ شام تک منجو اور سنجے کی شادی سمّو ماتا مندر میں کر دی گئی۔
منجو اور سنجے دونوں نے اعتراف کیا کہ ان کا پرانا رشتہ ہے اور وہ ایک ساتھ نئی زندگی شروع کرنا چاہتے ہیں۔ منجو کے سسر چندرِکا پرساد نے بتایا کہ وہ اس واقعے سے صدمے میں تھے، مگر حالات کو دیکھتے ہوئے گاؤں والوں کے مشورے اور پنچایت کے فیصلے کے مطابق یہ غیر معمولی قدم اٹھایا گیا۔
