کامیڈی میں پاکستان بھارت سے ہمیشہ آگے رہا ، طارق جیکسن

لاہور( فلم رپورٹر ) بین الاقوامی شہرت کے حامل کامیڈین طارق محمود جیکسن نے کہا ہے کہ میں نے بہت جگہ پرفارم کیا ہے مگر جو لطف لاہور میں پرفارم کرنے کا آتا ہے وہ دنیا کے کسی خطے میں نہیں آتا ، سینئرز کاکہنا ہے کہ جس فنکار نے لاہوریوں سے داد حاصل کر لی اس کو کسی اور جگہ سے سرٹیفکیٹ کی ضرورت نہیں اور حقیقی معنوں میں جن فنکاروں کو عروج ملا ہے اس کا آغاز لاہور سے ہی ہوا ہے ۔
طارق جیکسن نے کہا کہ کامیڈی کے میدان میں پاکستان بھارت کے مقابلے میں ہمیشہ آگے رہا ہے جس کا منہ بولتا ثبوت ہے کہ ہمارے فنکار بھارت میں جا کر پرفارم کرتے ہیں ۔ انہوں نے کہا کہ فنکار امن کا سفیر ہوتا ہے اور میں بھارتی حکومت سے درخواست کرتا ہوں کہ وہ اپنے ملک میں ہونے والی انتہا پسندی کے خاتمے کے لئے فوری ٹھوس اقدامات کرے تاکہ دونوں ملکوں کے درمیان امن کی فضاء پیدا ہو سکے ۔