2024ء،چھڑ جانے والی پاکستانی معروف شخصیات!

دنیا میں ہر گزرتے لمحے، دن مہینے اور سال ہمارے بہت سے عزیر و اقارب سمیت نامور شخصیات ہم سے بچھڑ جاتی ہیں لیکن ان کی یادیں ہمیشہ ہمارے ساتھ رہتی ہیں۔2024ء میں بھی بہت سی نامور شخصیات ایسی ہیں جو انتقال کر گئیں اور اپنے پیچھے اپنی یادیں چھوڑ گئیں۔آئیے گزرتے سال انتقال کر جانے والی پاکستانی مشہور شخصیات کی یادیں تازہ کرتے ہیں۔
خالد بٹ ایک معروف تجربہ کار اداکار تھے جنہوں نے اپنے شاندار کیریئر کا آغاز پی ٹی وی سے کیا۔انہوں نے اپنی زندگی کے کئی سال انڈسٹری کے لیے وقف کیے۔انہوں نے اپنی ورسٹائل پرفارمنس سے انڈسٹری میں جگہ بنائی۔ ایک نجی چینل کی مشہور ڈرامہ سیریل خئی میں انہوں نے آخری بار اداکاری کے جوہر دکھائے۔دل اور پھیپھڑوں کے مسائل سے دو چار ہونے کے باوجود انہوں نے ڈرامہ سیریل خئی میں جاندار اداکاری کی جسے ناظرین نے بے حد پسند کیا۔ابھی ڈرامہ سیریل خئی آن ایئر تھی کہ 11 جنوری کو خالد بٹ کے انتقال کی خبر آ گئی۔معروف پروڈیوسر راشد ڈار نے پی ٹی وی کے سنہرے دور میں اپنے کیریئر کا آغاز کیا، گزشتہ سال 20 مارچ کو وہ اس فانی دنیا سے رخصت ہو گئے۔
لیجنڈری پاکستانی کرکٹر سعید احمد بھی ان نامور پاکستانی شخصیات میں سے ایک ہیں جو گزشتہ سال اس فانی دنیا سے رخصت ہو گئے۔وہ 86 برس کی عمر میں اپنے مداحوں اور اہلِ خانہ کو سوگوار چھوڑ گئے۔ شوبز انڈسڑی کے مایہ ناز اداکار و صدا کار طلعت حسین کی جدائی کا غم بھی گزشتہ سال برداشت کرنا پڑا۔طلعت حسین 26 مئی کو 83 برس کی عمر انتقال کر گئے۔ انہوں نے اپنی عمر کا بیشتر حصہ اداکاری، صداکاری، آرٹ اور فن کو دیا اور انمٹ نقوش چھوڑے۔
ماضی کی نیوز کاسٹر تسکین ظفر بھی ان پاکستانی مشہور شخصیات میں سے ایک تھیں جنہوں نے گزشتہ سال اپنے مداحوں اور اہلِ خانہ کو ہمیشہ کے لئے غم زدہ چھوڑ دیا۔وہ پی ٹی وی کے سنہری دور کی مشہور نیوز کاسٹر تھیں، جنہوں نے ریڈیو پاکستان کے لیے بھی کام کیا۔وہ 67 سال کی عمر میں مختصر علالت کے بعد گزشتہ برس جون میں انتقال کر گئیں۔ناہید انصاری پاکستانی ٹیلی ویژن کی سب سے باصلاحیت اور پسندیدہ شیف تھیں۔اپنی پْرکشش شخصیت اور غیر معمولی کھانا پکانے کی مہارت کے ساتھ انہوں نے ناظرین کو اپنے سحر میں جکڑے رکھا، انہوں نے مختلف چینلز پر کھانا پکانا سکھایا۔ناہید آپا مختلف ٹی وی چینلز پر اپنے لذیز کھانوں اور بیکنگ کلاسز کے باعث مشہور تھیں۔ انہوں نے اپنی زندگی کے 35 سال سے زیادہ کھانا پکانے کے لیے وقف کیے۔ ناہید انصاری کے کوکنگ شوز نے ناصرف پاکستان بلکہ دنیا بھر میں مقبولیت حاصل کی اور اپنی غیر معمولی ترکیبوں سے سامعین کو مسحور کیا۔ان کے انتقال نے پاکستانی کھانا پکانے کی صنعت پر گہرا اثر چھوڑا ہے۔ ناہید انصاری چھاتی کے کینسر جیسے موذی مرض سے جنگ لڑتے ہوئے جولائی میں زندگی کی بازی ہار گئیں۔
 شوبز انڈسٹری کے سینئر اداکار و کامیڈین سردار کمال 30 جولائی کو دل کا دورہ پڑنے کے سبب انتقال کر گئے۔ان کا شمار پاکستان کے مایہ ناز کامیڈینز میں ہوتا تھا، وہ عرصہ دراز سے نجی ٹی وی کے ساتھ بھی منسلک تھے۔اپنے کریئر کے دوران اداکار سردار کمال نے سیکڑوں تھیٹر ڈراموں میں کام کیا اور مداحوں کو اپنے فن سے خوب محظوظ کیا۔ 2009ء  میں کوک سٹوڈیو سے شہرت حاصل کرنے والے میوزک بینڈ "زیب اینڈ حنیا" سے وابستہ 39 سالہ معروف پاکستانی گلوکارہ اور گٹارسٹ حنیا اسلم دل کا دورہ پڑنے سے 11 اگست کو انتقال کر گئیں۔ حنیا اسلم اور ان کی کزن زیب بنگش نے مل کر میوزک بینڈ "زیب اینڈ حنیا"کی بنیاد 2007ء میں رکھی تھی۔انہوں نے 2008ء میں کوک سٹوڈیو کے سیزن 2 میں اپنے گانے "پیمانہ" سے شہرت حاصل کی، تاہم حنیا 2014ء  میں موسیقی کوچھوڑ کر تعلیم مکمل کرنے کے لئے کینیڈا منتقل ہو گئی تھیں۔ انہوں نے 2016ء  میں کینیڈا سے ہی اپنے سولو کیریئر کا آغاز کیا، پھر پاکستان واپس آنے کے بعد مختلف فلموں میں بطور کمپوزر اپنی خدمات انجام دیں۔
 معروف سینئر اداکارہ شگفتہ اعجاز کے شوہر، فلم ساز یحییٰ صدیقی گزشتہ برس 12 ستمبر کو کینسر کے ہاتھوں زندگی کی بازی ہار گئے۔شگفتہ اعجاز کے دوسرے شوہر یحییٰ صدیقی گزشتہ 5 سال سے کینسر کے عارضے میں مبتلا تھے۔وہ انتقال سے قبل کئی دن تک ہسپتال میں زیرِ علاج رہے۔معروف فلم ساز الطاف حسین بھی ان پاکستانی مشہور شخصیات میں شامل ہیں جو گزشتہ سال دنیا سے رخصت ہو گئے۔ وہ اردو اور پنجابی دونوں سنیما کے بڑے پروڈیوسر اور ڈائریکٹر تھے۔پی ٹی وی سٹار مظہر علی بھی گزشتہ برس انتقال کر گئے۔وہ عروسہ، افشاں اور دیمک جیسے کئی ہٹ شوز کا حصہ تھے۔وہ امریکہ منتقل ہو گئے تھے اور مختصر علالت کے بعد ہیوسٹن میں انتقال کر گئے۔
عابد کشمیری ایک اور مشہور نام ہے جو گزشتہ سال اپنے مداحوں سے بچھڑ گئے۔انہوں نے تھیٹر، ٹیلی ویژن اور فلموں میں کام کیا، ان کے چاہنے والوں نے انہیں ہمیشہ پسند کیا۔وہ اپنے خاندان کے ساتھ امریکہ شفٹ ہو گئے تھے 11 اکتوبر 2024ء کو ان کا انتقال ہوا۔
استاد طافو خان پاکستان کے تجربہ کار موسیقار اور طبلہ نواز تھے۔میوزک انڈسٹری میں ان کی میراث بے مثال ہے، انہوں نے ملک کے تمام بڑے گلوکاروں کے ساتھ کام کیا تھا۔ان کا انتقال 26 اکتوبر 2024ء کو لاہور میں ہوا۔مشہور تھیٹر پروڈیو سر فرقان حیدر رضوی 10 نومبر 2024ء کو انتقال کر گئے۔انہوں نے بہت سے کامیاب شوز پروڈیوس کیے، جن میں ان کا سب سے قابلِ ذکر کام بکرا قسطوں پہ تھا،جس میں مرحوم عمر شریف نے اداکاری کے جوہر دکھائے تھے۔فرقان حیدر رضوی کا انتقال امریکی شہر ڈیلاس میں ہوا۔         ٭٭٭

final