"خواتین اور بچے ریڈ لائن"…وزیراعلیٰ کے حکم پر فوری کارروائی ،سرگودھا میں خواتین پر تشدد میں ملوث بس ڈرائیور اور کنڈیکٹرگرفتار
لاہور ( ڈیلی پاکستان آن لائن )خواتین اور بچے ریڈ لائن، وزیراعلیٰ پنجاب مریم نواز کے ویژن کے تحت سرگودھا میں بے کس خواتین پر تشدد میں ملوث بس ڈرائیور اور کنڈیکٹر کوگرفتارکر لیا گیا۔ جھارویاں کے دیہی علاقے میں بس ڈرائیور اور کنڈیکٹرنے کرایہ کے تنازع پر خواتین سے جھگڑا کیا۔بس ڈرائیور شوکت اور کنڈیکٹر شمشیر نے خواتین کو وحشیانہ تشدد کا نشانہ بنایا تھا۔ سوشل میڈیا پر وائرل ہونے والی ویڈیو میں بے بس خواتین روتے ہوئے مدد کی درخواست کرتی نظر آتی ہیں۔
وزیر اعلیٰ مریم نواز کے ویژن کے تحت ڈی پی او سرگودھا محمد صہیب اشرف کی نگرانی میں جھاوریاں پولیس نے فوری کارروائی کرتے ہوئے مبینہ تشدد میں ملوث بس ڈرائیور اور بس کنڈیکٹر کوگرفتار کر لیا گیا ہے۔ ڈی پی او سرگودھا کی نگرانی میں ملزمان کے خلاف قانونی کارروائی کا آغازکر دیا گیا ہے۔
وزیراعلیٰ مریم نواز کا کہنا ہے کہ خواتین اور بچے ریڈ لائن ہیں، کسی سطح پر کسی قسم کا تشدد قابل برداشت نہیں۔بسوں میں سفر کرنے والی خواتین کی حفاظت اور احترام ہر صورت یقینی بنایا جائے گا۔
وزیراعلیٰ مریم نواز نے کہا کہ "مریم نواز دیہی خواتین کیلیے مخصوص بس سروس" کے اجراء کے لیے اقدامات کیے جارہے ہیں۔
