افواج پاکستان کا راشد منہاس کے 53 ویں یوم شہادت پرخراج عقیدت
راولپنڈی (ڈیلی پاکستان آن لائن)پاکستان کی مسلح افواج، چیئرمین جوائنٹ چیفس آف سٹاف کمیٹی اور سروسز چیفس نے پائلٹ آفیسر راشد منہاس کے 53 ویں یوم شہادت کے موقع پر انہیں خراج عقیدت پیش کیا۔
آئی ایس پی آر کا کہنا ہے کہ پائلٹ آفیسر راشد منہاس پاکستان کی تاریخ میں جرأت اور قربانی کی روشن مثال کے طور پر ہمیشہ زندہ رہیں گے، انہوں نے آج کے دن 1971 میں ملک کی دفاع کے دوران اپنی جان کا نذرانہ پیش کیا۔ان کی بے مثال بہادری اور وطن کے تحفظ کے لیے غیر متزلزل عزم کی عکاسی کرتا ہے، جب ہم اس قومی ہیرو کو خراج عقیدت پیش کرتے ہیں، تو ہم ان کی غیر معمولی بہادری کے اس عمل کو یاد کرتے ہیں۔
آج کا دن ہماری مسلح افواج کے جذبے کی علامت اور ان کی ناقابل تسخیر وابستگی کا ثبوت ہے۔پائلٹ آفیسر راشد منہاس کی قربانی ہمیشہ ہماری تاریخ کا حصہ رہے گی اور آنے والی نسلوں کو ان کی مثالی بہادری اور وفاداری کو اپنانے کی ترغیب دے گی۔
پاکستان کی مسلح افواج پائلٹ آفیسر راشد منہاس کی غیر معمولی بہادری، ثابت قدمی اور فرض کے تئیں لگن کو سلام پیش کرتی ہیں، اوران کے ورثے سے تحریک حاصل کرتے ہوئے پیشہ ورانہ مہارت اور قوم کے ساتھ لگن کے اعلیٰ ترین معیار کو برقرار رکھنے کا عزم کرتی ہیں۔
