جنرل عاصم منیر سے پہلے برصغیر کے کن 3 جرنیلوں کو فیلڈ مارشل کا عہدہ مل چکا ہے؟
راولپنڈی (ڈیلی پاکستان آن لائن) آپریشن بنیان مرصوص کی کامیابی کے بعد وفاقی کابینہ نے آرمی چیف جنرل سید عاصم منیر کو فیلڈ مارشل کے عہدے پر ترقی دینے کی منظوری دے دی۔ اس کے علاوہ وفاقی کابینہ نے پاک فضائیہ کے سربراہ ایئر چیف مارشل ظہر احمد بابر سدھو کی مدت ملازمت ختم ہونے کے بعد ان کی خدمات جاری رکھنے کا فیصلہ کیا ہے۔ ان دونوں کو یہ اعزاز دینے کا فیصلہ آپریشن بنیان مرصوص کی کامیابی کے بعد کیا گیا ہے۔ جنرل عاصم منیر سے پہلے برصغیر میں تین جرنیل ایسے گزرے ہیں جنہیں فیلڈ مارشل کا عہدہ دیا جاچکا ہے۔
خطے کے پہلے فیلڈ مارشل جنرل ایوب خان تھے جنہوں نے 1958 میں اقتدار سنبھالا اور 1959 میں خود کو فیلڈ مارشل کے عہدے سے نوازا۔ انہوں نے اپنے آپ کو کوئی جنگ لڑے بغیر ہی فیلڈ مارشل کا عہدہ تفویض کیا تھا، حالانکہ ان کے فیلڈ مارشل بننے کے لگ بھگ چھ سال بعد 1965 میں پاک بھارت جنگ ہوئی تھی۔
خطے کے دوسرے فیلڈ مارشل بھارت سے تعلق رکھنے والے جنرل سیم مانک شا تھے ۔ انہوں نے 1971 کی جنگ میں بھارتی افواج کی قیادت کی اور بنگلہ دیش میں آپریشن کیا جس کے نتیجے میں پاکستان کے دو ٹکڑے ہوئے۔ اس آپریشن کے بعد 1973 میں انہیں یہ عہدہ دیا گیا تھا۔
بر صغیر میں فیلڈ مارشل کے عہدے پر ترقی پانے والے تیسرے شخص بھارتی فوج کے پہلے مقامی کمانڈر انچیف جنرل کے ایم کریاپا تھے جو 1953 میں ریٹائر ہوئے لیکن انہیں فیلڈ مارشل کا عہدہ 1986 میں تفویض کیا گیا۔
