پاک بحریہ کے جہاز پی این ایس معاون کا افریقی ملک سیشلز کا دورہ,بندرگاہ وکٹوریہ آمد پر پرتپاک استقبال
سورس: فوٹو: آئی ایس پی آر
راولپنڈی ( ڈیلی پاکستان آن لائن )پاک بحریہ کے جہاز پی این ایس معاون نےمشرقی افریقہ میں تعیناتی کے دوران افریقی ملک سیشلز کا دورہ کیا ۔بندرگاہ وکٹوریہ آمد پر پی این ایس معاون کا میزبان ملک کے اعلیٰ حکام نے پرتپاک استقبال کیا۔
آئی ایس پی آر کے مطابق کمانڈنگ آفیسر پی این ایس معاون نے سیشلز کےاعلیٰ سول و عسکری حکام سے اہم ملاقاتیں کیں ۔ملاقاتوں کے دوران پاکستان اور سیشلز کے مابین موجودہ تعلقات اور تعاون کو مزید بڑھانے کے مواقع پر تبادلہ خیال کیا گیا ۔کمانڈنگ آفیسر نے چیف آف نیول سٹاف ایڈمرل نوید اشرف کی طرف سے میزبان ملک کی عوام کے لیے نیک خواہشات کا اظہار کیا۔
آئی ایس پی آر کا کہنا ہے کہ پی این ایس معاون کے مشرقی افریقہ کے دورہ سے پاکستان اور افریقی ممالک کے مابین تعلقات کو مزید تقویت ملے گی۔
