” تو ہے کیا چیز ، تو باہر مل“  اپنے خلاف فیصلہ سنتے ہی ملزم کی خاتون جج کو کمرۂ عدالت میں دھمکیاں ، بھارتی کورٹ میں ہنگامہ

دہلی (آئی این پی) بھارتی دارالحکومت دہلی میں ایک عدالتی کمرہ اس وقت پرتشدد ہو گیا، جب ایک چیک باﺅنس کے کیس میں سزا یافتہ ملزم نے اپنے خلاف فیصلہ سنائے جانے پر وکیل کے ہمراہ خاتون جج کو باہر ملنے کی دھمکی دی۔

بھارتی میڈیا رپورٹس کے مطابق یہ معاملہ جوڈیشل مجسٹریٹ شیوانگی منگلا کے سامنے پیش آیا، جنہوں نے ملزم کو 2 اپریل کو چیک باﺅنس کیس میں نیگوشی ایبل انسٹرومنٹ ایکٹ کی دفعہ 138 کے تحت مجرم قرار دیا تھا اور اسے ضمانتی مچلکے فراہم کرنے کا حکم دیا تھا۔

رپورٹ کے مطابق خاتون جج کی جانب سے سزا کے فیصلے پر مجرم بھڑک گیا یہاں تک کہ اس نے مبینہ طور پر جج پر کچھ پھینکنے کی کوشش کی۔ اس نے اپنے وکیل سے کہا کہ وہ اس فیصلے کو تبدیل کرنے کے لیے جو کچھ بھی کرسکتے ہیں وہ کریں۔

مذکورہ شخص نے خاتون جج کو دھمکاتے ہوئے کہا کہ تو ہے کیا چیز تو باہر مل پھر دیکھتے ہیں کہ کیسے زندہ گھر جاتی ہے۔بھارتی میڈیا کے مطابق جج نے بتایا کہ ملزم اور اس کے وکیل اتل کمار نے صرف دھمکیاں ہی نہیں دیں بلکہ ان کے عہدہ چھوڑنے پر بھی زور دیا  تاہم انہوں نے پیچھے ہٹنے سے انکار کیا اور کہا کہ وہ انصاف کو یقینی بنانے کے لیے قانونی کارروائی ضرور کریں گی۔