فصلوں سے لکڑیاں اٹھانے پر زمیندار  نے خاتون پر پالتو کتے  چھوڑ دیئے

بہاولپور (ڈیلی پاکستان آن لائن) فصلوں سے لکڑیاں اٹھانے پر مبینہ طور  پر  زمیندار  نے محنت کش کی بیوی پر پالتو کتے  چھوڑ دیئے۔بہاولپور میں یزمان کے علاقہ چک 128 ڈی این بی میں پالتو کتوں کے حملے سے محنت کش کی بیوی شدید زخمی ہوگئی۔

خاتون کو تشویشنا ک حالت میں بہاول وکٹوریہ ہسپتال منتقل کردیا گیا۔متاثرہ خاتون کے شوہر کا کہنا ہےکہ اس کی بیوی گھر میں جلانے کے لیے علاقے سے لکڑیاں اٹھانےگئی تو زمیندار  اور  اس کے ساتھیوں نے پرانی رنجش کی بناء پر میری بیوی پر کتے چھوڑ دیئے اور شکاری کتوں نے میری بیوی کو بڑی طرح نوچ ڈالا۔

محنت کش نے اپنی بیوی پر کتوں سے حملہ کرانے والے ملزمان کی فوری گرفتاری اور انصاف کے لیے وزیراعلیٰ پنجاب سے نوٹس لینےکا مطالبہ کیا ہے۔پولیس نے خاتون پرکتےچھوڑنےکا مقدمہ شوہر کی مدعیت میں مقامی زمیندار کے خلاف درج کرلیا اور ملزمان کی تلاش شروع کردی ہے۔