کپل شرما شو کی ’دادی‘ نے بھی حج کرلیا
بمبئی (ڈیلی پاکستان آن لائن )معروف بھارتی کامیڈین کپل شرما شو کی دادی نے بھی فریضہ حج ادا کرلیا ۔
آپ حیران ہوں گے کہ کپل شرما تو ہندو ہیں تو ان کی دادی کیسے مکہ پہنچیں؟ تو جناب اس کا جواب ہے کہ کپل شرما کے ٹی وی شو ”دی کپل شرما شو“ میں ان کی دادی کا کردار نبھانے والے جو مسلم اداکار علی اصغر تھے، فریضہ حج انہوں نے ادا کیا ہے۔علی اصغر نے انسٹاگرام پر ایک پوسٹ جاری کی جس میں انہیں احرام باندھے کلاک ٹاور کے سامنے کھڑے دیکھا جاسکتا ہے۔پوسٹ کے کیپشن میں علی اصغر نے لکھا کہ ’اللہ کی ٹائمنگ سب سے زیادہ بہترین ہوتی ہے، جمعہ مبارک‘۔اس سے قبل علی اصغر نے خانہ کعبہ کی تصویر شیئر کرتے ہوئے لکھا تھا کہ ’یا اللہ ہم پر اپنے رحم کی بارش فرما‘۔
یاد رہے کہ بھارتی انٹرٹینمنٹ چینل ”سٹار پلس“ کے مشہور ڈرامے ”کہانی گھر گھر کی“ میں ”کمل اگروال“ کا کردار نبھانے والے علی اصغر نے ڈرامہ سیریز ”ایف آئی آر“ میں ”انسپکٹر راج آریان“ کا کردار بھی نبھایا ہے۔اگرچہ علی اصغر کو ”کمل اگروال“ کے کردار سے شہرت ملی لیکن ان کو منفرد پہچان دلانے والا پروگرام ”دی کپل شرما شو“ ثابت ہوا۔علی اصغر نے کپل شرما کی دادی کا کردار ادا کیا جو ناظرین کی جانب سے بے حد پسند کیا گیا اور ان کی بہترین اداکاری کے سبب لوگ یہ بھول ہی گئے کہ وہ خاتون نہیں بلکہ ایک مرد ہیں۔بعدازاں اس شو میں علی اصغر ”پشپا نانی“ کا کردار بھی نبھاتے نظر آئے جو سب کو پسند آیا لیکن دادی جتنا مقبول نہ ہوا۔
