ملائیشیا کے چڑیا گھر میں موجود بلیک پینتھر موٹاپے کا شکار ہوگیا

کوالالمپور(ڈیلی پاکستان آن لائن)ملائیشیا کے چڑیا گھر میں موٹاپے کا شکار بلیک پینتھر کو دیکھ کر لوگ حیران رہ گئے۔ سوشل میڈیا پر بلیک پینتھر کی ویڈیو وائرل ہورہی ہے جس میں تیز رفتار جانور کو موٹاپے کا شکار دیکھا جاسکتا ہے۔رپورٹس میں بتایا گیا ہے کہ چڑیا گھر میں موجود اس بلیک پینتھر  کا نام Apoh ہے جو اپنے غیر معمولی اضافی وزن کی وجہ سے لوگوں کی توجہ حاصل کرنے کے ساتھ ساتھ سوشل میڈیا پر بھی وائرل ہورہا ہے۔

اس حوالے سے چڑیا گھر انتظامیہ کا کہنا ہےکہ Apoh کی عمر 15 سال ہے  اور جنگل میں ان کی عمر 10 سے 12 سال تک ہوتی ہے۔انتظامیہ کے مطابق Apoh کو روزانہ کی بنیاد پر ڈھائی کلو گوشت دیا جاتا ہے اور ساتھ ساتھ ملٹی وٹامنز بھی دی جاتی ہیں تاکہ اس کی صحت کا خیال رکھا جاسکے۔انہوں نے مزید بتایا کہ بلیک پینتھر اپنی سرگرمیوں میں مصروف رہتا ہے، کبھی یہ درخت پر چڑھ جاتا ہے تو کبھی پتھروں پر آرام کرتا ہے،  یہ طبی عملے کی نگرانی میں موجود ہے اور ڈاکٹروں کی ٹیم اس کی دیکھ بھال کر رہی ہے۔