گجرات میں پیشی پر جانے والوں کی گاڑی پر مخالفین کی فائرنگ سے 4 افراد جاں بحق
گجرات (ویب ڈیسک) گجرات میں مبینہ طور پر مخالف پارٹی نے عدالت میں پیشی پر جانے والوں کی گاڑی پر فائرنگ کردی جس کے نتیجے میں 4 افراد جاں بحق ہوگئے۔
ابتدائی تفصیلات کے مطابق واقعہ گاؤں لادیاں کے قریب پیش آیا۔ ریسکیو حکام کے مطابق مقتولین کی شناخت عطا، عرفان، شہزاد، سفیان کے نام سے ہوئی ہے۔پولیس کے مطابق مقتولین عدالت پیشی پر جا رہے تھے، جاں بحق افراد کا تعلق کوٹلہ کے گاؤں سمرالہ سے ہے۔ پولیس نے لاشوں کو تحویل میں لے کر قانونی کارروائی شروع کردی۔
عینی شاہدین کے مطابق فائرنگ سے پورا علاقہ گونج اٹھا، مسلح ملزمان کارروائی کے بعد فوراً فرار ہوگئے۔ پولیس نے واقعہ سے متعلق شواہد اکٹھے کرکے تفتیش شروع کردی۔
