بھارتی کپتان روہت شرما نے سنیل گواسکر کی تنقید سے تنگ آ کر بڑا قدم اٹھا لیا

نئی دہلی (ویب ڈیسک) بھارتی کپتان روہت شرما نے مسلسل تنقید کا نشانہ بنانے پر سابق لیجنڈری کرکٹر سنیل گواسکر کے خلاف بھارتی کرکٹ بورڈ( بی سی سی آئی) میں شکایت درج کرا دی۔

تفصیلات کے مطابق کپتان روہت شرما کو آسٹریلیا کے خلاف گواسکر ٹرافی کے دوران بیٹنگ اور پھر کپتانی کے  لحاظ سے مشکلات کا سامنا کرنا پڑا۔ روہت شرما نے بارڈر گواسکر ٹرافی کے 3 ٹیسٹ میچوں میں صرف 31 رنز بنائےجبکہ ان کی کپتانی میں بھارت کو آسٹریلیا کے خلاف سیریز میں 1-3 سے شکست ہوئی اور بھارت ٹیسٹ چیمپئن شپ کے فائنل کی دوڑ سے باہر ہوگیا۔ 

اس مایوس کن کارکردگی پر سابق بھارتی کرکٹر سنیل گواسکر نے روہت شرما کی بیٹنگ اور کپتانی دونوں پر شدید تنقید کی تھی۔ گواسکر نے روہت کے ریڈ بال کرکٹ کے مستقبل پر بھی سوال اٹھائے تھے۔ گواسکر نے یہاں تک تجویز دی کہ بھارتی ٹیم کی بہتری کے لیے کسی اور کو قیادت سونپنے کا وقت آچکا ہے۔

بھارتی میڈیا رپورٹس کے مطابق یہ تنقید روہت شرما کو پسند نہیں آئی اور انہوں نے محسوس کیا کہ ان پر یہ تنقید غیر ضروری تھی اور اس کے نتیجے میں مبینہ طور پر روہت  نے بھارتی کرکٹ بورڈ میں سنیل گواسکر کے خلاف شکایت درج کرائی ہے۔

روہت کے قریبی ذرائع نے بھارتی میڈیا کو بتایا کہ روہت شرما کو لگا کہ سنیل گواسکر نے غیر ضروری تنقید کی اور اسی لیے انہوں نے گواسکر کے خلاف بی سی سی آئی میں شکایت کی۔