پاکستان تحریک انصاف نے احتجاج کی کال دے دی

اسلام آباد (ڈیلی پاکستان آن لائن) پی ٹی آئی نے 3 شہروں میں احتجاج کی کال دے دی۔

ترجمان پی ٹی آئی اور رکن قومی اسمبلی شیخ وقاص اکرم کی جانب سے جاری بیان میں کہا گیا ہے کہ اگلا پرامن احتجاج  2 اکتوبر کو میانوالی ، فیصل آباد اور ملتان میں ہوگا جو کہ عدلیہ کی آزادی ، بانی پی ٹی آئی کی رہائی اور مہنگائی کیخلاف ہوگا۔شیخ وقاص اکرم کا کہنا تھا کہ ہر کارکن تینوں شہروں میں گھروں سے باہر نکلیں اور احتجاج میں بھرپور حصہ لیں۔ان کا کہنا تھا کہ وزیر اعلیٰ خیبر پختونخوا علی امین گنڈاپور کی قیادت میں خیبرپختونخوا سے نکلنے والا قافلہ احتجاج کرتا رہا، راولپنڈی میں پی ٹی آئی کے کارکن ڈٹے رہے اور احتجاج کرتے رہے، 28 ستمبرکو راولپنڈی کے احتجاج پر عوام کو بھرپور خراج تحسین پیش کرتا ہوں۔ان کا مزید کہنا تھا کہ تمام اسٹیک ہولڈرز ، ایم پی ایز ، ایم این ایز سمیت جو بھی راولپنڈی پہنچا ان کا شکریہ۔