رجب المرجب کا چاند نظر آگیا، شب معراج کب ہوگی؟
اسلام آباد (ڈیلی پاکستان آن لائن) پاکستان میں رجب المرجب کا چاند نظر آگیا جس کا اعلان مرکزی رویت ہلال کمیٹی کی جانب سے کردیا گیا ہے۔
وزارت مذہبی امور کی طرف سے جاری نوٹیفکیشن کے مطابق مرکزی رویت ہلال کمیٹی کا اجلاس مولانا سید محمد عبدالخبیر آزاد کی زیر صدارت وزارت مذہبی امور میں ہوا جب کہ زونل اور ضلعی ہلال کمیٹیوں کے اجلاس اپنے اپنے متعلقہ مقامات پر ہوئے۔ مرکزی رویت ہلال کمیٹی نے اعلان کیا ہےکہ یکم رجب المرجب جمعرات 2 جنوری کو ہوگی جب کہ شب معراج 28 جنوری کو ہوگی۔
خیال رہے کہ شب معراج اسلامی تاریخ کا وہ مقدس موقع ہے جس میں حضور نبی اکرم ﷺ کو اللہ تعالیٰ نے معجزاتی طور پر آسمانوں پر بلایا۔ یہ رات عبادت، دعا، اور غور و فکر کے لیے انتہائی اہمیت رکھتی ہے۔ شب معراج کے دوران اللہ تعالیٰ نے اپنے محبوب رسول ﷺ کو بہت سے انعامات اور روحانی تجربات سے نوازا۔معراج کی رات پانچ وقت کی نماز کا حکم دیا گیا، جو مسلمانوں کے لیے فرض عبادت ہے۔
