ادھار کی رقم واپس مانگنے پر بہنوئی نے سالے کو ’اغواء‘ کرکے قتل کردیا

شیخوپورہ(ڈیلی پاکستان آن لائن)شیخوپورہ میں 3 لاکھ روپے ادھار کے معاملے پر بہنوئی نے اپنے سالے کو اغواء کرنے کے بعد قتل کردیا۔

نجی ٹی وی چینل" آج نیوز" کے مطابق پولیس کاکہنا ہے کہ 8 روز قبل اغواء کیے جانے والے نوجوان فہد کی لاش بہنوئی کے گھر کے صحن سے برآمد ہوئی۔دوران تفتیش بہنوئی علی تنویر نے قتل کا اعتراف کیا اور اس کی شناخت پر اس کے گھر کے صحن سے نوجوان فہد کی لاش برآمد کی گئی۔

پولیس نے بتایا کہ ملزم علی تنویر نے اپنے برادر نسبتی کو ادھار کے 3 لاکھ روپے کی رقم کی واپسی کا تقاضا کرنے پر گلہ دبا کر قتل کیا تھا۔پولیس کے مطابق اغواء کا مقدمہ 27 ستمبر کو اس کی والدہ کی مدعیت میں داماد علی تنویر، بیٹی زہرہ بی بی ،کاشف علی اور دیگر 2 نامعلوم افراد کے خلاف درج کیا گیا تھا۔