بلائنڈ ٹی 20ورلڈ کپ، پاکستان فائنل میں پہنچ گیا

                                                                                                                                                             لاہور(سپورٹس رپورٹر) پاکستان نے نیپال کو 10 وکٹوں سے شکست دیکر چوتھے ٹی ٹوئنٹی بلائنڈ کرکٹ ورلڈکپ کا فائنل کھیلنے کا اعزاز حاصل کرلیا۔ملتان کرکٹ سٹیڈیم میں میگا ایونٹ کے پہلے سیمی فائنل میں نیپال نے پاکستان کوجیت کیلئے 95 رنزکاہدف دیا جسے پاکستانی اوپنرز نے صرف 5.3 اوورزمیں مکمل کرلیا۔پاکستان کی جانب سے کامران اختر نے جارحانہ بیٹنگ کا مظاہرہ کرتے ہوئے 21بالز پر ایک چھکے اور 12 چوکوں کی مدد سے 63 رنز اور بابر علی نے 32 رنزبنائے۔قبل ازیں نیپال نے پہلے بیٹنگ کرتے ہوئے 20 اوورز میں 7 وکٹوں کے نقصان پر 94 رنزبنائے تھے۔نیپال کے دروگا دتہ نے 42بالز پر 40 رنزبنائے رمیض نے 30 بالزپر 17 رنزناٹ آؤٹ سکور کئے۔ پاکستان کی جانب سے مطیع اللہ نے 4 اوورز میں صرف 5 رنزکے عوض 3 کھلاڑیوں کو آؤٹ کیا۔