جدہ سیزن میں پاکستان نائٹ 2 اگست کو ہوگی، آئمہ بیگ اور بلال سعید پرفارم کریں گے: نوشین وسیم
ریاض (وقار نسیم وامق سے) سعودی جنرل انٹرٹینمنٹ اتھارٹی کی مشیر نوشین وسیم کا کہنا ہے کہ جدہ سیزن میں پاکستان سمیت دیگر غیر ملکیوں کے لیے بے شمار تفریحی پروگرام ترتیب دئیے گئے ہیں جن میں شرکت کرکے غیر ملکی اپنی ثقافتی رنگوں سے لطف اندوز ہوسکیں گے۔
سعودی دارالحکومت ریاض میں پریس کانفرنس کرتے ہوئے جنرل انٹرٹینمنٹ اتھارٹی کی مشیر نوشین وسیم کا کہنا تھا کہ جدہ سیزن شروع ہونے کے ساتھ ہی مختلف تفریحی سرگرمیوں کا آغاز ہوچکا ہے جس میں پاکستان سمیت دیگر غیر ملکیوں کو رنگارنگ تفریحی ماحول فراہم کرنے کا بھی اہتمام کیا گیا ہے جس کے لیے 2 اگست سے پاکستانی نائٹ کا آغاز کیا جائے گا جس میں پاکستان کے نامور سنگر آئمہ بیگ، بلال سعید اور دیگر اپنے فن کا مظاہرہ کریں گے جبکہ شرکاء دیگر ثقافتی سرگرمیوں سے بھی محظوظ ہوسکیں گے۔
جدہ سیزن میں بھارت، نیپال، انڈونیشیا، بنگلہ دیش، سری لنکا کے ثقافتی ویک کا اہتمام بھی کیا گیا ہے جس میں تمام غیر ملکی شرکت کرکے ایک دوسرے کے ثقافتی رنگوں سے مستفید ہوسکیں گے۔
