قیدیوں کی سزا میں معافی، بقیہ سزا اور رہائی کی تاریخ کا ریکارڈ آن لائن کر دیا گیا،ایس ایم ایس کیجیے تفصیلات جانیے
لاہور ( طیبہ بخاری سے )قیدیوں کی سزا میں معافی، بقیہ سزا اور رہائی کی تاریخ کا ریکارڈ آن لائن کر دیا گیا، بس ایک ایس ایم ایس کیجیے اور قیدیوں کی رہائی سے متعلق تمام معلومات جانیے۔
تفصیلات کے مطابق وزیراعلی پنجاب کے پریزن ریفارمز ایجنڈا کے تحت قیدیوں کی فلاح کیلئے انقلابی اقدام سامنے آیا ہے۔ محکمہ داخلہ پنجاب نے قیدیوں کی سزا میں معافی اور بقیہ سزا کا تمام ریکارڈ آن لائن کر دیا۔ سیکرٹری داخلہ پنجاب نور الامین مینگل نے محکمہ داخلہ میں منعقدہ تقریب میں جدید سسٹم کا افتتاح کر دیا۔ پنجاب بھر میں موجود قیدیوں کے اہل خانہ اب صرف ایک SMS کے ذریعے قیدی کی رہائی کی تاریخ بارے جان سکتے ہیں۔ ان معلومات کے حصول کیلئے شہری PMIS (Space)(Prisoner's Computer Number) لکھ کر 8070 پر میسج کریں۔ محکمہ داخلہ کے جوابی میسج میں قیدی کو ملنے والی گزشتہ 2 معافیوں کی تفصیل اور رہائی کی تاریخ دی جائے گی۔ یہ تمام معلومات صرف ایک میسج پر دستیاب ہیں جس کے سٹینڈرڈ چارجز 5 روپے ہیں۔
ترجمان محکمہ داخلہ پنجاب نے بتایا ہے کہ جیل قوانین کے مطابق قیدیوں کی سزا میں کمی یا معافی کی کئی صورتیں ہیں۔ سرکاری سطح پر معافی کے اعلان کے علاوہ تعلیم، تکنیکی صلاحیت کے حصول اور اچھے کردار پر سزا میں معافی دی جاتی ہے۔ سزا میں ہر معافی کو فوری طور پر قیدی کے ریکارڈ کا حصہ بنایا جانا ضروری ہے۔
سیکرٹری داخلہ پنجاب نور الامین مینگل نے جدید سسٹم کی افتتاحی تقریب سے خطاب میں کہا ہے کہ اب قیدیوں یا اہل خانہ کو سزا میں معافی کا ریکارڈ حاصل کرنے میں کوئی دشواری نہیں ہوگی۔ قیدیوں کی سزا میں معافی اور رہائی کا تمام ڈیٹا شفاف انداز میں آن لائن کر دیا گیا ہے۔ ایسا جدید سسٹم تیار کیا گیا تاکہ کسی قیدی کو مقررہ سزا سے ایک لمحہ بھی اضافی قید میں نہ رکھا جائے۔
سیکرٹری داخلہ پنجاب نے بتایا کہ قیدیوں کی سزا میں معافی کا ریکارڈ بروقت اپ ڈیٹ کرنے کیلئے قواعد و ضوابط جاری کیے ہیں۔ محکمہ داخلہ کے ڈائریکٹوریٹ آف مانیٹرنگ کو ہدایت کی ہے کہ جیلوں میں سرپرائز وزٹ کریں اور وزیراعلیٰ پنجاب کے پریزن ریفارمز ایجنڈا پر من و عن عملدرآمد یقینی بنایا جائے۔ انہوں نے واضح کیا کہ کسی بھی سطح پر قواعد کی خلاف ورزی کی صورت میں سخت ایکشن لیا جائے گا۔
محکمہ داخلہ پنجاب میں اس جدید سسٹم کی افتتاحی تقریب ہوئی جس میں سیکرٹری داخلہ پنجاب نور الامین مینگل کے ہمراہ سپیشل سیکرٹری فضل الرحمان، ایڈیشنل سیکرٹری پریزن عاصم رضا، چیئرمین پنجاب چیریٹی کمیشن کرنل شہزاد عامر، ایڈیشنل سیکرٹری جوڈیشل عمران رانجھا، ایڈیشنل سیکرٹری فارن نیشنل سیکیورٹی عظمیٰ سلیم و دیگر نے شرکت کی۔
