پاک بحریہ کے جہاز پی این ایس معاون کا کینیا کا خیر سگالی دورہ ، کمانڈنگ آفیسر کی کینیا کے اعلیٰ سول و عسکری حکام سے اہم ملاقاتیں
راولپنڈی (ڈیلی پاکستان آن لائن )پاک بحریہ کے جہاز پی این ایس معاون نےکینیا کا خیر سگالی دورہ کیا ۔
آئی ایس پی آر کے مطابق پاک بحریہ کا جہاز پی این ایس معاون انسانی ہمدردی کے مشن کی تکمیل کے سلسلے میں افریقہ کے دورے پر ہے ،پاک بحریہ نے جذبۂ خیر سگالی کے تحت کینیا میں میڈیکل کیمپ کا انعقاد کیا۔میڈیکل کیمپ میں کینیا کی عوام کو مفت علاج، آپریشنز اور مفت ادویات فراہم کی گئیں۔
آئی ایس پی آر کے مطابق کینیا کی عوام نے پاک بحریہ کی جانب سے میڈیکل کیمپ کے انعقاد کو بڑے پیمانے پر سراہا اور پاکستان کو خراجِ تحسین پیش کیا
قبل ازیں ممباسا بندرگاہ پہنچنے پر کینیا کے اعلیٰ سول و عسکری اور پاکستانی سفارتی حکام نے پاک بحریہ کے جہاز کا پرتپاک استقبال کیا۔
آئی ایس پی آر کے مطابق کمانڈنگ آفیسر کی کینیا کے اعلیٰ سول و عسکری حکام سے اہم ملاقاتوں کے دوران باہمی دلچسپی کے امور اور دو طرفہ بحری تعاون پر تبادلہ خیال کیا گیا ۔کمانڈنگ آفیسر نے چیف آف دی نیول اسٹاف ایڈمرل نوید اشرف کی جانب سے کینیا کی عوام اور بحریہ کیلئے خیرسگالی کا پیغام بھی پہنچایا۔
آئی ایس پی آر نے کہا ہے کہ دورے کا مقصد انسانی ہمدردی کے جذبے کا فروغ، دوطرفہ بحری تعاون کا مزید استحکام اور پاکستان کے مثبت تاثر کا فروغ ہے۔
