’توبہ توبہ۔۔۔ کیا اس طرح باؤلنگ ہوتی ہے‘ شعیب اختر پاکستانی باؤلرز پر پھٹ پڑے مگر کیوں؟ اعداد و شمار دیکھ کر ہر پاکستانی برہم ہو جائے
لاہور (ڈیلی پاکستان آن لائن) پاکستان کرکٹ ٹیم کے مایہ ناز سابق فاسٹ باؤلر شعیب اختر نے نیوزی لینڈ کے خلاف دوسرے ٹیسٹ میچ میں کرکٹ ٹیم کی باؤلنگ کو انتہائی نچلی سطح پر قرار دیتے ہوئے باؤلرز کو آڑے ہاتھوں لیا ہے۔
تفصیلات کے مطابق شعیب اختر نے سوشل میڈیا سائٹ ٹوئٹر پر پاکستان ٹیم کے باؤلنگ کے اعداد و شمار شیئر کئے اور ساتھ ہی نیوزی لینڈ کے خلاف دوسرے ٹیسٹ میچ میں باؤلنگ کو پاکستان کرکٹ تاریخ کی انتہائی نچلی سطح پر قرار دیا۔ شعیب اختر نے پاکستان کی باؤلنگ پر تبصرہ کرتے ہوئے لکھا ’توبہ توبہ۔۔۔ کیا اس طرح باؤلنگ ہوتی ہے۔۔۔ پاکستان کرکٹ تاریخ کی انتہائی نچلی سطح پر‘
توبہ توبہ۔۔۔۔کیا اس طرح باولنگ ہوتی ہے۔۔۔۔۔پاکستان کرکٹ تاریخ کی انتہائی نچلی سطح پر ???? pic.twitter.com/PvD0Fkr8AI
— Shoaib Akhtar (@shoaib100mph) January 5, 2021
واضح رہے کہ پاکستانی باؤلنگ لائن نے ایک اور ناپسندیدہ کارنامہ سر انجام دیتے ہوئے کرائسٹ چرچ ٹیسٹ میچ میں نیوزی لینڈ کیخلاف پہلی اننگز میں وائیڈز کی مد میں 17 رنز دئیے جو کسی بھی اننگز میں پاکستانی باؤلرز کی جانب سے دئیے گئے وائیڈ کے سب سے زیادہ رنز ہیں۔
پاکستان کرکٹ ٹیم نے اس سے قبل تین مرتبہ اننگز میں 15، 15 وائیڈ رنز دئیے تھے جبکہ ایک اننگز میں سب سے زیادہ وائیڈ رنز کے عالمی ریکارڈ کی تعداد 21 ہے۔ انگلینڈ نے 2019ءمیں نیوزی لینڈ کے خلاف اورویسٹ انڈیز نے 2008ءمیں آسٹریلیا کے خلاف وائیڈ کے 21,21 رنز دئیے تھے۔
