عمران خان کی فوری رہائی پر عمل درآمد ممکن نہیں: اعجاز الحق

اسلام آباد( ڈیلی پاکستان آن لائن) سربراہ مسلم لیگ’ضیا‘اعجازالحق نے کہا ہے کہ عمران خان کی فوری رہائی پر عمل درآمد ممکن نہیں۔
نجی ٹی وی دنیا نیوز کے پروگرام ”بات نکلے گی“میں گفتگو کرتے ہوئے اعجازالحق کا کہنا تھا کہ مذاکرات کی کامیابی کا انحصار تحریک انصاف پر ہے، تحریک انصاف کے مطالبے پر جوڈیشل کمیشن بنانے میں حرج نہیں۔
انہوں نے کہا کہ عمران خان کی فوری رہائی پر عملدرآمد ممکن نہیں، پی ٹی آئی کے کیسزعدالتوں میں ہیں، بانی پی ٹی آئی کو ایگزیکٹو آرڈر سے رہا نہیں کر سکتے، مذاکرات حکومت اور اسٹیبلشمنٹ کی مشاورت سے ہو رہے ہیں۔
اعجازالحق کا کہنا تھا کہ 24نومبر سے قبل کچھ لوگوں نے بانی پی ٹی آئی سے خفیہ ملاقاتیں کیں،اب مذاکرات پرکافی پیشرفت ہوچکی تھی، ماضی میں اگر تحریک انصاف بات مان لیتی توآج حالات مختلف ہوتے۔
ایک سوال کے جواب میں انہوں نے کہا کہ بھٹو کیس کا ریفرنس دوبارہ لا کرعدلیہ نے اپنا وقارمجروح کیا، رجیم چینج کے فوری بعد انتخابات ہوجاتے تویہی حکومت بنتی۔
سربراہ مسلم لیگ ’ضیا‘ کا کہنا تھا کہ عمران خان پی ٹی آئی کی حکومت کوبچانا چاہتا تھا، مجھے علم تھا متبادل نظام ڈیلیورنہیں کرسکے گا، بانی پی ٹی آئی سے کہاکہ جنرل باجوہ سے اپنے معاملات درست کریں۔
اعجازالحق نے مزید کہا کہ جنرل باجوہ نے بانی پی ٹی آئی کوآرمی ہاو¿س ملنے کا پیغام دیا، وزیرآباد حملے کے باعث میٹنگ نہ ہوسکی۔