امریکہ سے آئے وفد کی بانی پی ٹی آئی سے  ملاقات کا معاملہ ،وفاقی وزیر پارلیمانی امور کا جواب آ گیا

  اسلام آباد ( ڈیلی پاکستان آن لائن )امریکہ سے آئے وفد کی بانی پی ٹی آئی سے  ملاقات کا معاملہ ،وفاقی وزیر پارلیمانی امور طارق فضل چودھری  کا جواب آ گیا  ۔

"جیو نیوز" سے گفتگو کرتے ہوئے طارق فضل چوہدری سے سوال کیا گیا کہ کیا امریکہ سے آئے وفد کی بانی پی ٹی آئی سے  ملاقات کروائی گئی یا صرف ایک شخص کی؟ جس کے جواب میں انہوں نے کہا کہ تفصیل سے واقف نہیں ہوں لیکن بانی پی ٹی آئی سے ملاقاتیں کھلی ہیں۔

 وفاقی وزیر پارلیمانی امور طارق فضل چودھری  کا مزید کہنا تھا کہ بیرون ملک مقیم پاکستانیوں کو حق ہے کہ وہ یہاں آئیں لوگوں سے ملیں، سیاست کریں، اگر حکومت کی جانب سے انہیں کوئی تعاون چاہیے ہو تو وہ بھی کریں گے۔پاکستان کے شہری کسی بھی ملک میں ہوں یہ ان کا اپنا وطن ہے، پی ٹی آئی کے بعض لوگ ریاست، ریاستی اداروں کے خلاف بیان بازی کرتے ہیں، مجھ سمیت ہر پاکستانی اس کی مذمت کرتا ہے۔ پی ٹی آئی پروپیگنڈا کرتی ہے کہ لوگوں کو بانی پی ٹی آئی سے ملنے نہیں دیا جاتا، پی ٹی آئی کے اپنے اندورنی اختلافات ہیں ایک گروہ دوسرے کا راستہ روکتا ہے۔

طارق فضل نے یہ بھی کہا کہ ہر  ملک کے اپنے اندرونی معاملات ہوتے ہیں، کوئی دوسرا ملک کسی ملک پر دباؤ ڈالتا ہے نہ ڈال سکتا ہے۔