ایپل کے چیف ایگزیکٹو ٹم کک صبح 5 بجے اٹھ کر سب سے پہلا کام کیا کرتے ہیں؟

سان فرانسسکو (ڈیلی پاکستان آن لائن) ایپل کے چیف ایگزیکٹو آفیسر ٹم کک نے انکشاف کیا ہے کہ وہ اپنے دن کا آغاز صبح 5 بجے کے قریب  صارفین کی جانب سے کمپنی کو بھیجے گئے فیڈ بیک کو پڑھ کر کرتے ہیں۔ انہوں نے GQ میگزین کے ساتھ ایک انٹرویو میں کہا، 'اگر آپ  ایسی ٹیکنالوجی بنانے کے کاروبار میں ہیں  جو واقعی لوگوں کی زندگیوں کو بہتر بناتی ہے - آپ جاننا چاہتے ہیں کہ یہ کیا کر رہی ہے۔ آپ جاننا چاہتے ہیں کہ لوگ اس کے بارے میں کیسا محسوس کر رہے ہیں۔ ' انہوں نے مزید کہا، 'یقیناً مجھے بھی کچھ شکایات ملتی ہیں۔ وہ بھی اچھی ہیں کیونکہ اس سے پتا چلتا ہے کہ  ہمارے صارفین کیا سوچ رہے ہیں، وہ کیا محسوس کر رہے ہیں۔'

ٹم کک  کا ماننا ہے کہ صارفین کی رائے سے انہیں  یہ جان کر خوشی ہوتی ہے کہ ایپل کی ٹیکنالوجیز اور مصنوعات ان کی زندگیوں میں مثبت تبدیلی لا رہی ہیں۔  ایک مثال دیتے ہوئے  انہوں نے کہا کہ ایک گاہک، جس کے پاس آئی فون 14 تھا، نے انہیں  بتایا کہ ڈیوائس کی حادثات کا پتہ لگانے کی خصوصیت نے اس کی  اس وقت  کال کرنے میں مدد کی جب اسے دورہ پڑا۔ مسٹر کک نے پھر فون کے ایمرجنسی سیٹلائٹ کنیکٹیویٹی فیچر پر زور دیا، جو افراد کو ایسے مقامات پر ہنگامی خدمات کے لیے کال کرنے کی اجازت دیتا ہے جہاں موبائل نیٹ ورک نہیں ہے۔

ٹم کک ایک بڑی ٹیکنالوجی کمپنی کے  ان چند سربراہوں میں سے ایک ہیں جن کا ای میل ایڈریس عوام کے لیےدستیاب  ہے، جس سے یہ ظاہر ہوتا ہے کہ کمپنی بہتر پروڈکٹ دینے کے لیے پرعزم ہے اور اس بات کو یقینی بناتی ہے کہ ایپل صارفین کے تاثرات کو مدنظر رکھے۔