محمد اشفاق بدایونی کی دوسری کتاب "عابد اسکوائر"کی جلد رونمائی متوقع
مکہ مکرمہ (محمدعامل عثمانی) محمد اشفاق بدایونی نے بتایا کہ ان کی دوسری کتاب "عابد اسکوائر" منظرِ عام پر آنے والی ہے، وہ روزنامہ پاکستان سے خصوصی گفتگو کررہے تھے۔
انہوں نے کہاکہ بات تو درست ہے مگر اسکے پس منظر میں حقیقت یہ ہے کہ میری پہلی کتاب "یارانِ نکتہ داں کے لیئے" میں ابواب کے تسلسل میں ایک باب اردو ناول نگاری کا بھی ہے اور اسی باب میں میرا اردو ناولٹ "عابد اسکوائر" شامل ہے میں اس ناول کو ناول کے قارئین کے ذوقِ مطالعہ کی تسکین کے لیئے علحیدہ کتابی شکل میں لارہا ہوں۔
عابد اسکوائر ایک ایسا ناول ہے کہ جسکی اساس میں معاشرتی ناہمواریوں اور معاشی تنگی کے نتائج سے متاثر ہونے والے ایک گھر کی کہانی ہے۔ اس ناول میں انتہائی کوشش کی ہے کرداروں کے عکس کو اسطرح پیش کروں کہ ناول پڑھنے والا اُن کرداروں کے سحر سے باہر نہ آسکے جب تک کہ وہ پوری کتاب نہ پڑھ لے اور میں سمجھتا ہوں کہ ایک قلمکار کا کمال یہی ہوتا ہے کہ اسکا قاری اسکے لکھے ہوۓ لفظوں کے سحر میں جکڑ کر رہ جاۓ اور وہ اس کیفیت سے اُسی وقت باہر آۓ جب وہ تحریر کو مکمل پڑھ لے، اصل منصف قارئین ہی ہوتے ہیں لیکن میری یہ کوشش ہے کہ ناول، پڑھنے والوں میں قبولیت عامہ حاصل کرے۔
