190 ملین پاؤنڈ کیس بھی اعلیٰ عدالت میں ختم ہوجائیگا،شرائط پوری ہونگی تو مذاکرات چلیں گے ورنہ۔۔۔بیرسٹر علی ظفر کھل کر بول پڑے

 اسلام آباد ( ڈیلی پاکستان آن لائن ) پاکستان تحریک انصاف (پی ٹی آئی) سینیٹر بیرسٹر علی ظفر نے کہا ہے کہ بانی پی ٹی آئی تو اڈیالا جیل میں ہیں، کمرہ عدالت لایا جاسکتا تھا،  190 ملین پاؤنڈ کیس بھی اعلیٰ عدالت میں ختم ہوجائیگا۔شرائط پوری ہوں گی تو مذاکرات چلیں گے ورنہ یہ آخری میٹنگ ہے۔

"جیو نیوز "کے پروگرام" کیپٹل ٹاک "میں سینیٹر فیصل واوڈا اور بیرسٹر علی ظفر نے شرکت کی، اس موقع پر پی ٹی آئی سینیٹر نے کہا کہ ہمیشہ دیکھا ہے کہ جس کے خلاف کیس ہو وہ گھبراتا ہے۔یہ پہلی بار دیکھا، خلاف کیس ہونے کے باوجود بانی پی ٹی آئی نے کہا فیصلہ جلد سنایا جائے۔ سائفر اور عدت کیس ختم ہوا، 190 ملین پاؤنڈ کیس بھی اعلیٰ عدالت میں ختم ہوجائے گا۔

اُن کا  مزیدکہنا تھا کہ اطلاع دی گئی تھی کہ 11 بجے کیس لگے گا، وکلاء ساڑھے 10 بجے پہنچ گئے تھے، بانی پی ٹی آئی تو اڈیالا جیل میں ہیں، کمرۂ عدالت لایا جاسکتا تھا۔

پی ٹی آئی سینیٹر علی ظفر نے کہا کہ حکومت اگر مذاکرات میں فائدہ اٹھانے کے لیے فیصلے میں تاخیر کرا رہی ہے تو یہ اس کی غلط فہمی ہے، اب یہ فیصلہ حکومت کو کرنا ہے کہ مذاکرات کو آگے چلانا ہے یا نہیں ۔ بانی پی ٹی آئی نے واضح کہا کہ جوڈیشل کمیشن بنایا جائے اور کارکنوں کو رہا کیا جائے، دونوں شرائط پوری ہوں تو مذاکرات آگے چلیں گے ورنہ یہ آخری میٹنگ ہے۔