مریم نواز کی قیادت میں ترقی کے نئے ریکارڈ قائم کیے جا رہے ہیں: سہیل شوکت بٹ کا لودھراں میں 55 اجتماعی شادیوں کی تقریب سے خطاب
لاہور(ڈیلی پاکستان آن لائن ) وزیراعلیٰ پنجاب مریم نواز کے تاریخی اقدام"دھی رانی پروگرام" کے تحت لودھراں میں 55 اجتماعی شادیوں کی پروقار تقریب کا انعقاد ہوا۔ اجتماعی شادیوں کی تقریب میں صوبائی وزیر سوشل ویلفیئر و بیت المال سہیل شوکت بٹ بطور مہمانِ خصوصی ہوئے ۔تقریب میں رکن صوبائی اسمبلی شازیہ حیات ترین، سابق ایم پی اے ملک شاہ محمد جوئیہ، ڈی جی محکمہ سماجی بہبود طارق قریشی، ڈپٹی کمشنر ڈاکٹر لبنیٰ نزیر اور ڈسٹرکٹ پولیس آفیسر کامران ممتاز بھی شریک تھے ۔
اجتماعی شادیوں کی تقریب سے خطاب کرتے ہوئے صوبائی وزیر سوشل ویلفئیر سہیل شوکت بٹ نے کہا کہ 26 اضلاع میں دھی رانی پروگرام کا کامیاب انعقاد کیا گیا ہے ۔ وزیراعلیٰ مریم نواز نے اس پروگرام کے ذریعے والدین کے دل کی آواز بن کر ثابت کیا کہ وہ قوم کی بیٹی اور شفیق ماں ہیں ۔ سماجی بہبود کی بنیاد پر ہی مدینہ کی ریاست کا خواب شرمندہ تعبیر ہو سکتا ہے ۔ ہ دھی رانی پروگرام کے ذریعے ریاست کو ماں بنتے دیکھنا خوش آئند ہے ۔ دھی رانی پروگرام کے ذریعے یہ پیغام دیا گیا ہے کہ بیٹیاں سب کی سانجھی ہیں ۔
صوبائی وزیر سہیل شوکت بٹ نے کہا کہ ریاست کے تمام وسائل عوام کو ان کا حق انکی دہلیز پر پہنچانے کے لیے بروئے کار لائے جا رہے ہیں ۔ پنجاب حکومت عوامی خدمت کے میدان میں پورے ملک کی قیادت کر رہی ہے اور وزیراعلیٰ مریم نواز کی قیادت میں ترقی کے نئے ریکارڈ قائم کیے جا رہے ہیں ۔
تقریب کے اختتام پر صوبائی وزیر سہیل شوکت بٹ اور دیگر معزز مہمانوں نے شادی کے بندھن میں بندھنے والے 55 جوڑوں میں سلامی کے اے ٹی ایم کارڈز تقسیم کیے۔ تقریب میں مہمانوں کے لیے مقامی رقص جھومر پیش کیا گیا اور تقریب میں شادی شدہ جوڑوں اور ان کے عزیز و اقارب کے لیے پرتکلف کھانے کا بھی اہتمام کیا گیا تھا ۔ تقریب میں ممتاز عالم دین مولانا محمد میاں نے دعائے خیر کروائی جبکہ نوبیاہتا کرسچن جوڑے کے لیے پاسٹر نے دعا کروائی ۔
