ابوظہبی میں جاں بحق ہونے والے 4 دوستوں کی میتیں پاکستان پہنچ گئیں, ہر آنکھ اشکبار

وہاڑی، دبئی (ویب ڈیسک)  ابوظہبی میں روڈ ایکسیڈنٹ میں جاں بحق ہونے والے4 دوستوں کی میتیں پاکستان پہنچ گئیں۔چاروں دوستوں کی میتیں جب ان کے گاؤں پہنچیں تو کہرام مچ گیا ہر آنکھ اشکبار تھی، جاں بحق ہونے والوں کو نماز جنازہ کے بعد ان کے آبائی قبرستانوں میں سپرد خاک کر دیا گیا ہے۔

تفصیلات کے مطابق وہاڑی کے رہائشی مقصود آرائیں، شاہد آرائیں، زاہد آرائیں اور شہزاد آرائیں گزشتہ دنوں ابوظہبی میں روڈ ایکسیڈنٹ میں جاں بحق ہو گئے تھے، جن کی میتیں لاہور ائیرپورٹ پہنچیں جہاں سے بذریعہ ایمبولینس وہاڑی لائی گئیں۔

شہزاد آرائیں اور شاہد آرائیں کی میتیں تدفین کے لیے ان کے آبائی قبرستان ساہیوال اور کہروڑپکا روانہ کر دی گئیں۔مقصود آرائیں اور زاہد آرائیں کی نماز جنازہ 3 ڈبلیو بی وہاڑی میں ادا کرنے کے بعد انہیں سپرد خاک کر دیا گیا۔جاں بحق ہونے والے چاروں نوجوان دوست اور آپس میں عزیز تھے۔