امریکہ میں چور آرمی ریزرو سینٹر سے بکتر بند گاڑیاں، مشین گنوں سمیت بہت سا اسلحہ چرا کر لے گئے

واشنگٹن (ڈیلی پاکستان آن لائن) امریکی ریاست کیلیفورنیا کے شہر ٹسٹن میں واقع آرمی ریزرو سینٹر سے تین ہموویز اور دیگر فوجی سامان چوری کر لیا گیا۔پولیس کا کہنا ہے کہ  چوروں نے بدھ کی رات 8 بجے سے 11:30 بجے کے درمیان سینٹر میں داخل ہو کر یہ واردات کی۔

فاکس نیوز کے مطابق  چوروں نے سینٹر میں موجود سٹوریج ویئر ہاؤس کے کئی لاکرز کے تالے توڑ دیے اور اندر موجود قیمتی سامان چرا لیا۔ تاہم ان کی فوجی یونیفارمز کے سٹوریج روم کا تالا توڑنے کی کوشش ناکام رہی۔ چوروں نے فوجی گاڑیوں کی پارکنگ کے قریب باڑ کاٹ کر اندر داخل ہو کر تین ہموویز چرا لیں، جن میں ایک بکتر بند ہمووی اور دو کپڑے کے دروازوں والی ہموویز شامل ہیں۔ اس کے علاوہ چور آٹھ  مشین گن ماؤنٹس، سات مشین گن کے سٹینڈ، چالیس  دوربینیں، اٹھارہ  خنجر اور طبی سامان بھی لے گئے۔

پولیس کا کہنا ہے کہ چور رات کے کسی وقت جائے وقوعہ سے فرار ہو گئے۔ آرمی کے مطابق اس واقعے میں کسی اضافی ہتھیار یا گولہ بارود کی چوری کی اطلاع نہیں ملی۔ پولیس چوروں کی شناخت اور چوری شدہ سامان کی برآمدگی کے لیے تحقیقات کر رہی ہے۔