5 سال میں پنجاب اور پاکستان کی قسمت بدل دیں گے: وزیراعلیٰ مریم نواز
لاہور ( ڈیلی پاکستان آن لائن ) وزیراعلیٰ پنجاب مریم نواز نے کہا ہے کہ 5 سال میں پنجاب اور پاکستان کی قسمت بدل دیں گے۔
تفصیلات کے مطابق وزیراعلیٰ پنجاب مریم نواز نے زہرہ ہومز / مسکن راوی کی افتتاحی تقریب سے خطاب کرتے ہوئے کہا کہ اللہ تعالیٰ کا شکر ہے کہ 100مستحق خاندانوں کو اپنی چھت اور اپنا گھر مل گیا۔زہرہ ہومز مسکن راوی کوڈھائی ماہ کی قلیل مدت میں مکمل کرنے پر روڈا اور وزارت ہاؤسنگ شاباش کو دیتی ہوں۔جن کو گھر ملا ہے اور ان کو دیکھ کر تسلی ہے کہ مستحق اور حقدارکو اس کا حق ملا۔
وزیر اعلیٰ نے کہا کہ قائد محمد نوازشریف نے زندگی45سال ملک و قوم کی خدمت و ترقی کے لئے وقف کیے ہیں۔ ایٹمی پاورپاکستان کا نام آتا ہے تب محمد نوازشریف کی بات ہوتی ہے۔جب معاشی ترقی کی بات ہوتی ہے تو محمد نوازشریف کی بات ہوتی ہے۔ جب جب موٹرویز کی بات ہوتی تب تب محمد نوازشریف کی بات ہوتی ہے۔ ہم جو کام کررہے ہیں وہ محمد نوازشریف کا ویژن ہے۔ ہم محمد نوازشریف کے فٹ سولجر بن کر دن رات ملک و قوم کی خدمت میں مصروف عمل ہیں۔
انہوں نے کہا کہ زہرہ ہومز/ مسکن راوی میں میرٹ اور حقدار کو حق پہنچانے کو یقینی بنایا گیا ہے۔شفافیت اور میرٹ کو برقرار رکھنے کے لئے چیک اینڈ بیلنس کا نظام رکھا ہے۔زہرہ ہومزکے الاٹیز کو کہنا چاہتی ہوں یہ گھر رہتی زندگی تک آپ کا ہے۔ یہ آپ کا گھر ہے جو کہ اللہ تعالیٰ نے دیا اور ہمیشہ آپ کا ہی رہے گا۔ اپنی چھت، اپنا گھر دنیا کی بہترین سکیمز میں ایک ہے۔ پنجاب میں 22لاکھ خاندانوں کے پاس اپنا گھر نہیں ہے۔ان شاء اللہ ایک سال کے اندر ایک لاکھ خاندانوں کو گھر فراہم کیے جائیں گے۔ ایک سے 10مرلے کا پلاٹ رکھنے والوں کو15 لاکھ روپے تک بلا سود آسان شرائط پرقرض دے رہے ہیں۔ قرضہ حاصل کرنے والوں کو سات سال میں آسان اقساط پر ہر ماہ میں 14ہزار روپے قسط دینی ہوگی۔ اگر کسی نے 7 سال کے لئے 15لاکھ روپے لیے ہیں تو 15لاکھ روپے ہی دینے ہیں، ایک روپہ بھی اوپر نہیں دینا۔ الحمد اللہ مہینوں میں اپنی چھت، اپنا گھر پروگرام فنکشنل کر دیا ہے۔ پنجاب کے 37اضلاع میں اپنی چھت، اپنا گھر سکیم سے ہزاروں گھر زیر تعمیر ہے، کچھ تکمیل کے آخری مراحل میں ہیں۔
وزیر اعلیٰ مریم نواز نے کہا کہ اپنی چھت، اپنا گھرپروگرام سے بننے والے پہلے پانچ گھروں میں فرنیچر بطور گفٹ فراہم کیا جائے گا۔اپنی چھت، اپنا گھرپروگرام کے فیڈ بیک کی کالز دعائیں سے بھر پور ہوتی ہیں، جن کو سن کر سکون سے نیند آتی ہے۔ پراجیکٹس کے فیڈ بیک سے مزید محنت اور کام کرنے کی ہمت پیدا ہوتی ہے۔ فیڈ بیک دینے والے سب ایک ہی بات کرتے ہیں کہ ہم سوچ بھی نہیں سکتے تھے کہ کبھی ہمارا اپنا گھر ہوگا۔ آئندہ چند ماہ میں مزید ہزاروں گھر مکمل ہوجائیں گے۔بہت جلد ایسی سکیم لارہے ہیں جس میں مستحق افراد کوگھربنانے کے لئے مفت رہائشی پلاٹ دیں گے۔ ہزاروں مستحق اور نادار افراد کو تین مرلہ کا پلاٹ دیں گے۔ پوری کوشش ہے کہ محمد نوازشریف کے خواب کو محنت کے ساتھ شرمندہ تعبیر کروں۔ میں نے پولیس اور انتظامیہ کے لئے کے پی آئی مقرر کیے ہیں، محمد نوازشریف نے میرے لیے کے پی آئی مقرر کیاہے۔محمد نوازشریف کے ہر پراجیکٹ پر پنجاب کی عوام نے بے حد اعتماد کیا، لاکھوں اپیلی کیشن موصول ہوئیں۔
وزیر اعلیٰ مریم نواز نے کہا کہ اللہ تعالیٰ کا شکر ہے کہ پنجاب کے عوام جانتے ہیں کہ محمد نوازشریف جو سکیم شروع کرتا ہے وہ پوری کرتا ہے۔ اپنی چھت، اپنا گھرپروگرام کو عوام میں بے حد پذیرائی مل رہی ہے۔لاکھوں فارمرز،کسان کارڈ اور لائیو سٹاک کارڈ سے مستفید ہورہے ہیں۔لوگوں کے گھروں میں مفت ادویات پہنچائی جارہی ہیں۔ہسپتال میں 100فیصد مفت ادویات کی فراہمی کو یقینی بنا یاگیا، ٹیسٹ بھی فری ہیں۔ نوازشریف کینسر ہسپتال سمیت دیگر ہسپتال بن رہے ہیں اور جدید آلات لائیں جارہے ہیں۔ چلڈرن ہارٹ سرجری پروگرا م کے تحت بچوں کا مفت علاج کیا جارہا ہے۔ ستھرا پنجاب پروگرام کے لئے مشینری خریدی گئی ہے۔لوگوں کے دروازے کھٹ کھٹا کرکوڑاکرکٹ اٹھایا جارہا ہے۔ گلیاں، بازار،شہر اور صوبہ چمک رہا ہے۔30ہزار بچوں کو ہونہار سکالر شپ دیا ہے۔
وزیر اعلیٰ مریم نواز نے کہا کہ کوئی بھی شخص کسی بھی پراجیکٹ میں سفارش کا الزام نہیں لگا سکتا ہے۔میرے دل و دماغ میں کسی شہر یا لوگوں کے لئے کوئی تفریق موجود نہیں۔پنجاب کا ہر شہر میرے دل کے اتنا ہی قریب ہے جتنا کہ لاہور۔ پنجاب میں بسنے والا ہر شخص میرے دل کے بے حد قریب ہے۔400سڑکیں بن رہی ہیں۔ 25 الیکٹرک بسیں کراچی پورٹ پر پہنچ چکی ہیں۔500بسوں کا آرڈر کر دیا ہے اور نئے روٹس بنائیں جائیں گے۔کسی بھی دور میں مہنگائی 38فیصد سے کم ہوکر 6فیصد تک نہیں آئی۔روٹی 30روپے سے 12روپے کی ہوگی۔ اللہ تعالیٰ کا شکر ہے کہ آٹے کی قیمت بھی کم ہوئی ہے۔اپنی ٹیم سے ہمیشہ لڑائی رہتی ہے کہ کسی بھی قیمت پر آٹے اور روٹی قیمت نہ بڑھے۔ان شاء اللہ آنے والے دنوں میں مزید پراجیکٹ لارہے ہیں۔
