دھی رانی پروگرام: خانیوال اور وہاڑی میں58جوڑوں کی اجتماعی شادی کا اہتمام ،تقریب سے صوبائی وزیر سہیل شوکت بٹ کا خطاب

 لاہور ( ڈیلی پاکستان آن لائن ) وزیراعلیٰ پنجاب مریم نواز  کا تاریخی دھی رانی پروگرام،خانیوال پبلک سکول میں دھی رانی پروگرام کےدوسرے فیز میں خانیوال اور وہاڑی اضلاع میں58جوڑوں کی اجتماعی شادی کا اہتمام کیا گیا۔صوبائی وزیر سوشل ویلفیئر و بیت المال سہیل شوکت بٹ تقریب کے مہمان خصوصی تھے۔اجتماعی شادی تقریب میں ارکان اسمبلی رانا سلیم حنیف،بیرسٹر اسامہ فضل،چوہدری ضیاء الرحمن،عامر حیات ہراج،ڈپٹی کمشنر ڈاکٹر سلمیٰ سلیمان ،ڈی پی او اسماعیل کھاڑک بھی موجود تھے۔نئے جوڑوں کی آمد پر خوشیوں کو دوبالا کرنے کیلئے روایتی جھومر ڈانس بھی پیش کیا گیا۔
صوبائی وزیر سہیل شوکت بٹ نے وزیراعلیٰ مریم نواز  کیطرف سے نئے جوڑوں کو مبارکباد دیتے ہوئے کہا کہ پنجاب دھی رانی پروگرام کو تاریخ میں ہمیشہ یاد رکھا جائے گا،اجتماعی شادی کی پروقار تقریب میں ضلعی اور سوشل ویلفیئر کی ٹیموں کو مبارکباد دیتا ہوں۔ وزیر اعلیٰ پنجاب کی ہر بیٹی کیلئے شفیق ماں کا کردار ادا کررہی ہیں۔شادی تقریبات میں نئے جوڑوں کے والدین نے دھی رانی پروگرام پر وزیراعلیٰ پنجاب کیلئے نیک خواہشات کا اظہار کیا ہے،پنجاب میں عوامی خدمت کے بے شمار انیشیٹیوز کی بدولت وزیراعلیٰ پنجاب مریم نواز  ملک بھر میں پہلے نمبر پر ہیں۔

صوبائی وزیر سہیل شوکت بٹ نے نئے جوڑوں کو تحائف بھی دیئے۔انہوں نے جوڑوں کی نشستوں پر جاکر انہیں سلامی کے اے ٹی ایم کارڈز بھی دیئے۔ڈپٹی کمشنر ڈاکٹر سلمیٰ سلیمان نے کہا کہ خانیوال اور وہاڑی کے جوڑوں کے نئے سفر کی کامیابی کیلئے دعاگو ہیں۔

تقریب میں اے ڈی سی جی غلام مصطفیٰ سیہڑ،اے ڈی سی فنانس اینڈ پلاننگ وہاڑی مظفر خان،اے سی سنبل جاوید،پرنسپل ارشد سعید رانا،ڈپٹی ڈائریکٹر سوشل ویلفیئر عکاشہ رسول،میاں ماجد،زین علی،عثمان خورشید بھی ودیگر موجود تھے۔تقریب میں نئے جوڑوں،انکے مہمانوں کیلئے کھانے کا اہتمام بھی کیا گیا۔