مری دنیا میں بندے کے خدا ہونے کا وقت آیا۔۔۔داستانِ فن برصغیر کے معروف شاعر  ہری چند اختر کی

تحریر : آغا نیاز احمد مگسی 

شباب آیا کسی بت پر فدا ہونے کا وقت آیا
مری دنیا میں بندے کے خدا ہونے کا وقت آیا

آئیے آج ہم آپ کو داستانِ فن سناتے ہیں برصغیر کے معروف شاعر  ہری چند اختر کی ۔

 برصغیر کے معروف شاعر ہری چند اختر  15 اپریل 1900 کو پنجاب  کے ضلع ہوشیارپور کے ایک چھوٹے سے قصبے صاحبا میں پیدا ہوئے ۔ ان کا گھرانا ایک ایسا برہمن گھرانا تھا جہاں علم وادب اور شعر وشاعری کا دور  دورتک کوئی نام و  نشان نہیں تھا لیکن ہری چند کی طبیعت ابتداء ہی سے شاعری کی طرف مائل ہوگئی۔ ہری چند نے اپنی تعلیم گورنمنٹ ہائی سکول جالندھر اور لاہور کے فارمن کرسچین کالج سے کی، ایم اے کی ڈگری اسلامیہ کالج لاہور سے حاصل کی۔ شاعری کے ابتدائی دنوں میں ہری چند ”شرما“ تخلص کرتے تھے، حفیظ جالندھری سے ملاقات اور ان سے شرف تلمذ حاصل کرنے کے بعد’ اختر‘ تخلص اختیار کیا۔

 ہری چند اختر کا شمار طنز ومزاح کے ممتاز شاعروں میں ہوتا ہے۔ انھوں نے سنجیدہ شاعری بھی کی لیکن ان کے اس کلام میں بھی زیریں سطح پر طنز ومزاح کی لہریں نظر آتی ہیں ۔ ہری چند اختر ایک عجیب سیمابی طبیعت کے مالک تھے۔ انھوں نے زندگی میں کبھی اپنا شعری مجموعہ بھی نہیں چھپوایا  یکم جنوری 1958 میں ان کی وفات ہوئی ۔ ان کی وفات کے بعد ان کے دوست عرش ملسیانی نے ان کا منتشر کلام جمع کرکے ’کفروایمان‘ کے عنوان سے شائع کیا۔

 ان کے کلام سے منتخب اشعار ملاحظہ کیجیے
ہمیں بھی آ پڑا ہے دوستوں سے کام کچھ یعنی 
ہمارے دوستوں کے بے وفا ہونے کا وقت آیا 

۔۔۔۔۔۔۔۔۔۔۔۔۔۔۔

مجھ کو دیکھا پھوٹ کے رویا 
اب سمجھا سمجھانے والا 

۔۔۔۔۔۔۔۔۔۔۔۔۔۔۔

 ملے گی شیخ کو جنت ہمیں دوزخ عطا ہوگا 
بس اتنی بات ہے جس بات پر محشر بپا ہوگا 

۔۔۔۔۔۔۔۔۔۔۔۔۔۔۔۔۔۔

 ہاں وہ دن یاد ہیں جب ہم بھی کہا کرتے تھے 
عشق کیا چیز ہے اس عشق میں کیا ہوتا ہے 

۔۔۔۔۔۔۔۔۔۔۔۔۔۔۔۔۔

 اب آپ آ گئے ہیں تو آتا نہیں ہے یاد 
ورنہ ہمیں کچھ آپ سے کہنا ضرور تھا 

۔۔۔۔۔۔۔۔۔۔۔۔۔۔۔۔

 جنہیں حاصل ہے تیرا قرب خوش قسمت سہی لیکن 
تیری حسرت لیے مر جانے والے اور ہوتے ہیں 

۔۔۔۔۔۔۔۔۔۔۔۔۔۔۔۔۔۔

 رہے دو دو فرشتے ساتھ اب انصاف کیا ہوگا 
کسی نے کچھ لکھا ہوگا کسی نے کچھ لکھا ہوگا 

۔۔۔۔۔۔۔۔۔۔۔۔۔۔۔۔۔۔

 ستم کوشی میں دل سوزی بھی شامل ہوتی جاتی ہے 
محبت اور مشکل اور مشکل ہوتی جاتی ہے 

۔۔۔۔۔۔۔۔۔۔۔۔۔۔۔۔۔۔

 جو ٹھوکر ہی نہیں کھاتے وہ سب کچھ ہیں مگر واعظ 
وہ جن کو دست رحمت خود سنبھالے اور ہوتے ہیں 

۔۔۔۔۔۔۔۔۔۔۔۔۔۔۔۔۔۔۔

 داتا ہے بڑا رزاق مرا بھرپور خزانے ہیں اس کے 
یہ سچ ہے مگر اے دست دعا ہر روز تقاضا کون کرے 

۔۔۔۔۔۔۔۔۔۔۔۔۔۔۔۔۔۔۔۔

 جمع ہیں سارے مسافر نا خدائے دل کے پاس 
کشتیٔ ہستی نظر آتی ہے اب ساحل کے پاس 

۔۔۔۔۔۔۔۔۔۔۔۔۔۔۔۔۔

 مرے چمن کی خزاں مطمئن رہے کہ یہاں 
خدا کے فضل سے اندیشۂ بہار نہیں 

نوٹ : ادارے کا لکھاری کی آراء سے متفق ہونا ضروری نہیں