نفرت کی سیاست نے کچھ نہیں دیا، ہمیں ملک کی خاطر ذاتی انا قربان کرنا ہوگی: مریم نواز

کالا شاہ کاکو(ڈیلی پاکستان آن لائن) وزیراعلیٰ پنجاب مریم نواز شریف نے کہا ہے کہ نفرت کی سیاست نے اس ملک کو کچھ نہیں دیا، ہمیں ملک کی خاطر ذاتی انا قربان کرنا ہوگی۔

تفصیلات کے مطابق وزیراعلیٰ پنجاب مریم نواز  نے گندم کے کاشتکاروں کے لیے اہم اعلانات کر دیئے،وزیراعلیٰ نے کسان کارڈ کے ذریعے لون ڈیڑھ لاکھ سے بڑھا کر 3لاکھ روپے کردیااورزرعی ٹیوب ویل کی سولرائزیشن پر 95فیصد تک سبسڈی کا اعلان کیا۔کسان کارڈ نہ رکھنے والے کاشتکاروں کے لئے ایس ایم ایس اور ہیلپ لائن سسٹم لانچ کرنے کا اعلان کیااوراگلے سال 20ہزار کاشتکاروں کو سبسڈی پر گرین ٹریکٹر دینے اورہر تحصیل میں رینٹل ایگری کلچر مشینری سنٹرقائم کرنے کا اعلان بھی کیا۔

وزیراعلیٰ پنجاب  نے کالاشاہ کاکو رائس ریسرچ انسٹی ٹیوٹ میں تقریب سے خطاب کرتے ہوئے سب سے پہلے کاشتکاروں بھائیوں کو آپریشن بنیان مرصوص کی کامیابی پر مبارکباد پیش کی۔وزیراعلیٰ  نے وزیراعظم محمد شہباز شریف،آرمی چیف جنرل عاصم منیر،پاک فوج کے ہر افسر اورجوان کو خراج عقیدت پیش کیا۔انہوں نے رینجرز،پولیس،سول ڈیفنس،انتظامیہ اور تمام سرکاری اداروں کو شاباش دی۔

وزیراعلیٰ مریم نواز  نے اپنے خطاب میں مزیدکہا کہ افواج پاکستان پر فخر ہے،قوم نے متحد ہو کر ملک کی سلامتی کیلئے اہم کردار ادا کیا۔پاکستان ہے تو ہم ہیں،کاشتکار ہے،زمینیں ہیں اور خوشحالی ہے۔اللہ تعالی ملک کو تاقیامت سلام رکھے۔جب ملکی سلامتی کی بات ہو تو کوئی اختلاف اور تقسیم نہیں ہونی چاہیے۔نفرت کی سیاست نے پاکستان کو کیا دیا؟نفرت کی سیاست ختم ہوئی تو پاکستان ترقی کی راہ پر چل نکلا۔ جنگ شروع ہوئی تو لوگ کہتے تھے کہ یہ چھوٹا سا ملک ہے اور یہ سب آپس میں لڑتے رہتے ہیں۔اللہ تعالیٰ نے مدد کی اوردشمن کو دھول چٹائی۔اللہ تعالیٰ کی مدد،بدنیت اور نفرتیں پیدا کرنے والوں پر نہیں آتیں،سیاسی، عسکری قیادت عوام اور میڈیا نے جنگ کے دوران بھرپور ساتھ دیا۔کسان بھائیوں،کاشتکاروں اور عوام کی طرف سے سیاسی اور فوجی قیادت کو سلام پیش کرتے ہیں۔یہ سرحدوں کی جنگ نہیں بلکہ نظریہ اور جذبوں کی جنگ تھی۔جنگ میں فتح کے بعد دنیا بھر میں پاکستان کو مضبوط اور طاقتور ملک تسلیم کیا جارہے۔ چین،ترکیہ اوروسط ایشیائی ممالک کا پاکستان کے ساتھ ڈٹ کرکھڑے ہونا تاریخی فتح ہے۔

وزیراعلیٰ مریم نواز  نے کہا کہ پاکستان کی معیشت ڈوبنے کی پیش گوئی کرنے والے اب اسے معجزہ قرار دے رہے ہیں۔پاکستان کی اکانومی معجزہ بن چکی ہے،40فیصد سے تقریباً صفر پر مہنگائی کا آنا معجزے سے کم نہیں۔ لاہور کے دورے کے دوران خاتون نے سبزیوں کے نرخ کم ہونے پر مبارکباد دی۔پنجاب میں جو پیاز300روپے کلو بکتا تھا،50 روپے میں مل رہا ہے۔غریب کے لیے آٹے اور روٹی کے نرخ کم ہونے کی وجہ سے پیٹ بھر کر کھانا آسان ہوا ہے۔ نااہل حکومت کی وجہ سے سابقہ دور میں بجلی کے بلوں میں ہوشربا اضافہ ہوا۔وزیراعظم محمد شہباز شریف محنت کرکے بجلی کے نرخ نیچے لارہے ہیں۔بجلی کے نرخ کم ہونے کی وجہ سے اب بجلی کا بل بھی کم آئے گا۔اوورسیز پاکستانیوں کو پیسے بھیجنے سے روکا گیاتھا مگراللہ کی مدد سے ریکارڈزرمبادلہ آرہا ہے۔

 وزیراعلیٰ مریم نواز  نے کہا کہ مفت ٹریکٹر حاصل کرنے والے کاشتکاروں کو مبارکباد پیش کرتی ہوں۔کیش سپورٹ پر مبارکباد دیتی ہوں،شور مچایا گیا کہ کسان رل گئے۔کسان بھائیوں سے دوریاں پیدا کرنے کی کوششیں ناکام ہوئیں۔ پنجاب کے کسان تاریخی پیکج سے مستفید ہورہے ہیں۔کسان بھائیوں نے پراپیگنڈے پر کان نہیں دھرے اور میری اپیل پر گندم اگائی۔میں نے کہا کہ کاشتکار بھائی بے دھڑک گندم اگائیں،نقصان نہیں ہونے دیں گے۔ گندم کی سپورٹ پرائس کی بجائے کاشتکار کو ڈائریکٹ سبسڈی دے رہے ہیں۔روٹی اورآٹا سستا ہونے کی وجہ سے غریب کے لیے پیٹ بھرنا آسان ہو گیا ہے۔چاہتی ہوں تمام وسائل کسان بھائیوں کے قدموں میں رکھ دیں لیکن توازن قائم کرنے کے لیے بعض سخت فیصلے بھی کرنے پڑتے ہیں۔

وزیراعلیٰ مریم نواز  نے کہا کہ گندم کے کاشتکاروں کو 5ہزار فی ایکڑ سپورٹ پرائس دی جارہی ہے۔بیج،کھاد اور پیسٹی سائز،ٹیوب ویل کے بجلی بل اور ڈیزل کا خرچ کم کرنے کی پوری کوشش کررہے ہیں۔ لوگوں نے کہا کسان کو قرض نہ دو،واپس نہیں ملے گا۔کسان کارڈ سے85فیصدرقوم واپس ہو چکی ہیں۔ پہلے محمد نواز شریف کی حکومت میں گرین ٹریکٹر ملے،اب بھی نواز شریف کی حکومت آئی ہے تو گرین ٹریکٹر مل رہے ہیں۔گندم کی کاشت کے موسم میں بیج اور پیسٹی سائز مہنگی اور کھاد کی قلت ہو جاتی تھی۔اللہ تعالیٰ کے فضل وکرم سے سب کو مناسب قیمت پر وافر کھاد ملتی رہی۔

وزیراعلیٰ مریم نواز  نے کہا کہ اس سال جلد بوائی کی وجہ سے کاٹن30سے 40فیصد زیادہ ہو گی اور پیداوار6ملین گانٹھیں ہوں گی۔کاشتکار بھائی کسی کے بہکاوے میں نہ آئیں،ہمارا دل آپ کے ساتھ ہے۔اگلاآنے والا سال مزید بہتری اور خوشحالی لائے گا۔ خواہش ہے کہ ہر کاشتکار خوشحال ہو اور پاکستان زراعت کے شعبے میں سب سے آگے ہو۔رزق اللہ تعالیٰ دیتا ہے لیکن زمین پر رزق اگانے کے لیے کاشتکار محنت کرتا ہے۔

وزیراعلیٰ مریم نواز نے صوبائی وزیر زراعت عاشق کرمانی،سیکرٹری زراعت افتخار سہو اور پورے ایگری کلچر ڈیپارٹمنٹ کو شاباش بھی دی۔