اتوار کو بھارت کو شکست دینے کے لیے میدان میں اتریں گے، بنگلہ دیش سے جیت کر سلمان علی آغا کا بیان
دبئی(ڈیلی پاکستان آن لائن) پاکستان کے کپتان سلمان علی آغا نے بنگلہ دیش کے خلاف سنسنی خیز میچ جیتنے کے بعد کھلاڑیوں کی محنت اور ٹیم اسپرٹ کو سراہا۔ انہوں نے کہا کہ اس طرح کے میچ جیتنے والی ٹیم خاص ہوتی ہے، سب نے اپنی ذمہ داری نبھائی۔ جس طرح شاہین اور حارث نے شاندار بولنگ کی،وہ واقعی کمال تھا۔سلمان آغا نے کہا کہ ٹیم مختلف طریقے سے میچ جیتنے کے راستے تلاش کر رہی ہے۔ انہوں نے تسلیم کیا کہ بیٹنگ میں ٹیم 10 سے 15 رنز کم رہی، لیکن اگر بولرز نئے گیند کے ساتھ دباؤ ڈالیں تو کسی بھی ٹیم کو ہرانا آسان ہو جاتا ہے۔
انہوں نے محمد حارث کی تعریف کرتے ہوئے کہا کہ "وہ ایک خاص کھلاڑی ہے، اپنی اصل پوزیشن پر بیٹنگ نہیں کر رہا مگر کبھی شکوہ نہیں کیا۔ اس نے ہمیشہ کہا جو ٹیم کو چاہیے وہ کرے گا اور وہ ہر میچ میں کارکردگی دکھا رہا ہے۔کپتان نے فیلڈنگ پر بھی زور دیا اور بتایا کہ کوچ مائیک اور فیلڈنگ کوچ شین کی سخت محنت کے باعث ٹیم کی فیلڈنگ بہت بہتر ہوئی ہے۔ اب ٹیم میں وہی کھیل سکتا ہے جو اچھی فیلڈنگ کرے، سب کھلاڑی اس پر بھرپور محنت کر رہے ہیں۔بھارت کے خلاف فائنل کے حوالے سے سلمان آغا نے کہا بہت پرجوش ہیں، ہمیں معلوم ہے کہ کیا کرنا ہے،ہم اتنی مضبوط ٹیم ہیں کہ کسی کو بھی ہرا سکتے ہیں اور اتوار کو بھارت کو شکست دینے کے لیے میدان میں اتریں گے۔"
