زرد چہرہ ہے نحیف و زار ہوں | میر انیس |
زرد چہرہ ہے نحیف و زار ہوں
ماتمِ سجاد میں بیمار ہوں
مثلِ بوئے گل سفر ہو گا مرا
وہ نہیں میں جو کسی پر بار ہوں
بلبلیں دم بھر جدا ہوتی نہیں
کس گلِ تر کے گلے کا ہار ہوں
عالمِ پیری میں آئے کون پاس
اے عصا گرتی ہوئی دیوار ہوں
ہر کس و ناکس سے جھکنے کا نہیں
ہمدمو میں تیغِ جوہر دار ہوں
اے زمیں مجھ کو حقارت سے نہ دیکھ
آسماں کا طرّۂ دستار ہوں
شہ کو عرضی میں یہ صغرا نے لکھا
رحم کیجیے طالبِ دیدار ہوں
شام سے گنتی ہوں تارے تا سحر
صورتِ مہتاب شب بیدار ہوں
کہتے تھے عباس اے فوجِ یزید
میں غلامِ سیدِ ابرار ہوں
میرا آقا ہے حسین ابنِ علی
ابنِ زہرا کا علم بردار ہوں
کہتے تھے عابد قدم کیوں کر اٹھیں
اے ستمگارو نحیف و زار ہوں
دم بدم کھینچو نہ میرے ہاتھ کو
پاؤں پڑ سکتے نہیں ناچار ہوں
سوکھ کر کانٹا ہوا ہوں پر انیس
آنکھ میں دشمن کی اب تک خار ہوں
شاعر: میر انیس
(شعری مجموعہ: انیس کے سلام ؛مرتبہ،علی جواد زیدی،سالِ اشاعت،1981)
Zard Chehra Hay Naheef -o-Zaar Hun
Maatam-e-Sajjad Men Bemaar Hun
Misl-e-Bu-e-Gull Safar Ho Ga Mira
Wo Nahen Main Jo Kisi Par Baar Hun
Bulbulen Dam Bhar Juda Hoti Nahen
Kiss Gul-e-Tar K Galay Ka Haar Hun
Aalam-e-Peeri Men Aaey Kon Paas
Ay Asaa Girti Hui Dewaar Hun
Har Kas-o-Naakis Say Jhuknay Ka Nahen
Hamdamo , Main Taigh-e-Johar Daar Hun
Ay Zameen Mujh Ko Haqaarat Say Na Dekh
Aasmaan Ka Turra-e-Dastaar Hun
SHAH Ko Arzi Men SUGHRA Nay Yeh Likha
Rehm Kijiay Taalib-e-Dedaar Hun
Shaam Say Ginti Hun Taaray Ta Sahar
Soorat -e-Mahtaab Shab Bedaar Hun
Kehtay Thay ABBAS Ay Faoj-e-Yazeed
Main Ghulam-e- SAYYED-e-ABRAAR Hun
Mera Aaqa Hay HUSSAIN Ibn-e-ALI
Ibn-e-ZAHRA Ka Alam Bardaar Hun
Kehtay Thay ABID Qadam Kiun Kar Uthay
Ay Sitam Gaaro Naheef-o-Zaar Hun
Dam Badam Khaincho Na Meray Haath Ko
Paaon Parr Saktay Nahen Nachaar Hun
Sookh Kar Kaanta Hua Hun Par ANEES
Aankh Men Dushman Ki Ab Tak Khaar Hun
Poet: Meer Anees
