ایک آنچ کی کمی  | اصغر ندیم سید|

ایک آنچ کی کمی  | اصغر ندیم سید|

  

ایک آنچ کی کمی

سورج آسمان سے گرا 

اور لیموں بن گیا 

چاند آسمان سے گرا 

اور کپاس کا پھول بن گیا 

میں تاریخ کے مینار سے گرا 

اور واقعہ کیوں نہ بن سکا 

پانی دریاؤں سے نکلا 

اور جنگل بن گیا 

لفظ کتاب سے نکلا 

اور عالم بن گیا 

میں اس کی نیت کے اندھیرے سے نکلا 

اور آزادی کیوں نہ بن سکا 

ہوا بادبان سے گری 

اور ملاح کا گیت بن گئی 

بوسہ ہونٹوں سے گرا 

اور محبت کا پرندہ بن گیا 

دن عقاب کی چونچ سے گرا 

اور سورج مکھی کا باغ کیوں نہ بن سکا 

تیر کمان سے نکلا 

اور بادشاہ بن گیا 

شہزادہ محل سے نکلا 

اور جوگی بن گیا 

خیال اپنے مدار سے نکلا 

اور نظم کیوں نہ بن سکا 

خواہش دل سے گری 

اور کالا گلاب بن گئی 

نکتہ دھیان سے گرا 

اور صوفی بن گیا 

میں زمین پر گرا 

اور بارش کا قطرہ کیوں نہ بن سکا

شاعر: اصغر ندیم سید

(شعری مجموعہ: ادھوری کلیات، سالِ اشاعت، 2014)

Sooraj   Aasmaan   Say   Gira

Aor   Lemoon   Ban   Gaya

Chaand    Aasmaan   Say   Gira

Aor   Kapaas   Ka   Phool   Ban   Gaya

Main   Tareekh    K   Meenaar   Say  Gira 

Aor   Waaqia  Kiun  Na   Ban  Saka

Paani   Daryaaon   Say   Nikla

Aor   Jangal   Ban   Gaya

Lafz   Kitaab   Say   Nila

Aor   Aalam   Ban   Gaya

Main   Uss   Ki   Niyyat   K   Andhairay   Say   Nikla

Aor   Aazaadi   Kiun   Na   Ban   Saka

Hawa   Baadbaan    Say   Giri

Aor   Mallah   Ka   Geet   Ban   Gai

Bosa   Honton   Say   Gira

Aor   Muhabbat   Ka    Prinda   Ban   Gaya

Din   Uqaab   Ki   Choonch   Say   Gira

Aor   Sooraj   Mukhi   Ka   Baagh   Kiun   Na   Ban   Saka

Teer   Kamaan   Say   Nikla

Aor   Baadshaah   Ban   Gaya

Shehzaada    Mahall    Say   Nikla

Aor    Jogi    Ban   Gaya

Khayal    Apnay   Madaar   Say   Nikla

Aor    Nazm    Kiun    Na    Ban   Saka

Khaahish    Dil    Say    Giri

Aor    Kaala    Gulaab    Ban   Gai

Nukta    Dhayaan    Say   Gira

Aor    Sufi   Ban    Gaya

Main    Zameen   Say    Gira    Aor    Baarish   Ka    Qatra    Kiun    Na    Ban   Ska

Poet: Asghar    Nadeem    Sayed

مزید :

شاعری -سنجیدہ شاعری -