وزیر اطلاعات پنجاب عظمیٰ بخاری کی اے پی این ایس کے نومنتخب عہدیداروں کو مبارکباد
لاہور (ڈیلی پاکستان آن لائن) وزیر اطلاعات پنجاب عظمیٰ بخاری نےاے پی این ایس کے نومنتخب عہدیداران کو مبارکباد پیش کی ہے۔ عظمیٰ بخاری نے سرمد علی کو صدر، ناز آفرین سہگل کو سینئر نائب صدر اور اطہر قاضی کو جنرل سیکرٹری منتخب ہونے پر نیک تمناؤں کا اظہار کیا۔ اس کے ساتھ ساتھ، انہوں نے شہاب زبیری کو نائب صدر، محسن بلال کو جوائنٹ سیکرٹری اور نوید کاشف کو فنانس سیکرٹری منتخب ہونے پر بھی دلی مبارکباد دی۔
وزیر اطلاعات عظمیٰ بخاری نے کہا کہ اے پی این ایس کی پرنٹ میڈیا انڈسٹری میں صحافت کے فروغ میں ایک شاندار تاریخ رہی ہے اور تنظیم نے ہمیشہ حقائق پر مبنی اور ذمہ دارانہ صحافت کو فروغ دیا ہے۔ پنجاب حکومت میڈیا اور میڈیا ورکرز کے مکمل تحفظ اور آزادی پر یقین رکھتی ہے اور اس ضمن میں ہر ممکن اقدامات کیے جا رہے ہیں۔
انہوں نے مزید کہا کہ پنجاب واحد صوبہ ہے جہاں صحافیوں کی فلاح و بہبود کے لیے عملی اقدامات کیے گئے ہیں۔عظمیٰ بخاری نے اس موقع پر اعلان کیا کہ وزیر اعلیٰ پنجاب مریم نواز جلد ہی صوبے کے صحافیوں کو ان کے اپنے گھروں کی فراہمی کے منصوبے کا آغاز کریں گی، جو کہ میڈیا ورکرز کے لیے ایک تاریخی پیش رفت ہوگی۔
