ویرات اورروہت کا معیار دیکھ کر تیاری کرتے ہیں، فخر زمان
لاہور(ڈیلی پاکستان آن لائن)پاکستان کرکٹ ٹیم کے اوپننگ بیٹر فخر زمان نے کہا ہے کہ بھارتی بیٹر ویرات کوہلی اور روہت شرما اتنی کرکٹ کھیل چکے ہیں کہ ان کی فارم کو نہیں ان کے معیار کو دیکھ کر تیاری کرتے ہیں، ان کے اگر کچھ میچز برے ہوئے یا فارم نہ ہوں تو اس کا مطلب یہ نہیں کہ ان کو آسان سمجھیں گے۔آن لائن پریس کانفرنس میں فخر زمان کا کہنا تھاکہ دبئی کی وکٹیں اب پہلے کی طرح سلو نہیں ہوتیں، گراؤنڈ اسٹاف پر منحصر ہے کہ چیمپئنز ٹرافی کیسی وکٹیں ہوتی ہیں، ہر جگہ پر فلیٹ وکٹس ہونا اچھی بات نہیں ہوتی، مختلف کنڈیشنز میں کھیلنا چاہیے، انٹرنیشنل لیول پر کھیلنے والا ہر کھلاڑی میچ ونر ہی ہوتا ہے اس لیے وہ اپنی قومی ٹیم کیلئے کھیلتا ہے۔
انہوں نے کہا کہ میری نظر میں ہاردک پانڈیا، ویرات کوہلی اور روہت شرما بھارت کیلئے اہم پلیئرز ثابت ہوں گے، جسپریت بمرا ورلڈ کلاس بولر ہے، کسی ایک پلیئر کیلئے تیاری نہیں ہوتی، پورے گیارہ کیلئے تیاری کرتے ہیں۔فخر زمان کا کہنا تھاکہ ہم بھی اپنی تیاری کررہے ہیں اور یقینی طور پر انڈین پلیئِرز بھی اپنی تیاری کررہے ہوں گے، ویرات اور روہت اتنی کرکٹ کھیل چکے ہیں کہ ان کی فارم کو نہیں ان کے معیار کو دیکھ کر تیاری کرتے ہیں، ان کے اگر کچھ میچز برے ہوئے یا فارم نہ ہوں تو اس کا مطلب یہ نہیں کہ ان کو آسان سمجھیں گے۔
انہوں نے کہا کہ لوگ زیادہ مسئلہ بنادیتے ہیں جب بڑے پلیئرز آؤٹ آف فارم ہوتے ہیں، ہم ان پلیئرز کو ویسے ہی ٹریٹ کرتے ہیں کہ وہ ٹاپ پلیئر ہیں، آئی سی سی ایونٹس میں وکٹیں زیادہ چیلنجنگ نہیں ہوتی بطور کرکٹر ہم اپنے کیرئیر میں یہی سیکھتے ہیں کہ کچھ بھی ہو ہمیں کھیل پر فوکس رکھنا ہے۔قومی بیٹر کا کہنا تھاکہ بھارتی ٹیم پاکستان آتی تو اچھا ہوتا لیکن یہ چیزیں ہمارے کنٹرول میں نہیں، ہمارے کنٹرول میں یہی ہے کہ ہم اچھی کرکٹ کھیلیں، بھارت کے خلاف میچ میں ہوم کراؤڈ کی کمی محسوس ہوگی لیکن امید ہے دبئی میں بھی سپورٹ کی امید ہے، کراؤڈ کی سپورٹ اپنی جگہ اہم ہے لیکن سب سے زیادہ اہم یہ ہے کہ ہم بطور ٹیم گراؤنڈ میں کیسا پرفارم کرتے ہیں۔
