صدر زرداری پر تنقید کرکے بیرسٹرگوہر اپنا قد بڑھانے کی کوشش کر رہے ہیں، شرجیل میمن
کراچی (ڈیلی پاکستان آن لائن) وزیراطلاعات سندھ شرجیل انعام میمن کا کہنا ہے کہ صدر آصف علی زرداری پر تنقید کرکے بیرسٹر گوہر اپنا قد بڑھانے کی کوشش کر رہے ہیں، آئی ایم ایف کو خط لکھ کر امداد بند کروانے کی کوشش کرنے والے بیرسٹرگوہر کی آصف علی زرداری پر تنقید مضحکہ خیز بات ہے ۔
اپنے ایک بیان میں ان کا مزید کہنا تھا کہ شہید بی بی کے بعد آصف زرداری وفاق کو مضبوط کرنے کی علامت کے طور پر سامنے آئے ،آصف علی زرداری جمہوریت کی حوصلہ افزائی اور غیر جمہوریوں کی حوصلہ شکنی کا استعارہ ہیں، صدر آصف علی زرداری نے کے پی کے کو نام دیا، گلگت بلتستان کو صوبے کا درجہ دیا، آصف علی زرداری نے پاکستان کھپے کا نعرہ لگا کر وفاق کو مزید مستحکم کیا،صدر آصف علی زرداری نے اٹھارویں ترمیم کو ذریعے صوبوں کو حقوق دے کر وفاق کو مضبوط کیا،اے این پی کو سینیٹ تک پہنچا کر آصف علی زرداری نے جو روایت قائم کی وہ پاکستان کی سیاسی تاریخ میں کسی نے نہیں کی۔
شرجیل میمن کا کہنا تھا کہ صدر آصف علی زرداری کی پالیسیوں اور اقدامات سے ملک میں جمہوریت مستحکم ہوئی اور قوم پر مثبت اثرات مرتب ہوئے، ملک میں قابل ذکر اقتصادی ترقی اور استحکام صدر آصف علی زرداری کے تجربوں کے بدولت آیا، ویژن 2025 جیسے اسٹریٹجک اقدامات کے ذریعے صدر آصف علی زرداری نے عالمی معیشت میں پاکستان کا مقام بلند کرنے کے لیے انتھک محنت کی،ملکی ترقی، استحکام، معاشی اصلاحات، سرمایہ کاری کو بڑھانا، ملازمتیں پیدا کرنا صدر آصف زرداری کا مقصد رہا ہے، پاکستان کی ترقی اور خوشحالی میں صدر آصف علی زرداری کے اہم کردار کو تسلیم کرنا ضروری ہے۔
