ویمنز ورلڈکپ کوالیفائرز کی ٹیم آف دی ٹورنامنٹ کا اعلان، فاطمہ ثنا کپتان مقرر

لاہور (ڈیلی پاکستان آن لائن )انٹرنیشنل کرکٹ کونسل (آئی سی سی) نے ویمنز کرکٹ ورلڈکپ کوالیفائر 2025 کی ’ٹیم آف دی ٹورنامنٹ‘ کا اعلان کردیا جس کی قیادت قومی ویمنز ٹیم کی کپتان فاطمہ ثنا کو سونپی گئی ہے۔
ڈان نیوز کے مطابق آئی سی سی کی ویب سائٹ پر جاری ٹیم آف دی ٹورنامنٹ میں ویمنز کرکٹ ورلڈکپ کوالیفائیر میں شامل 4 ٹیموں سے کھلاڑیوں کو منتخب کیا گیا ہے۔ویمنز کرکٹ ورلڈکپ کوالیفائر 2025 کی ٹیم آف دی ٹورنامنٹ پاکستان ویمنز ٹیم کی 4، ویسٹ انڈیز 3، بنگلہ دیش اور سکاٹ لینڈ کی 2،2 کھلاڑی شامل ہیں۔ویمنز کرکٹ ورلڈکپ کوالیفائر 2025 کی ٹیم آف دی ٹورنامنٹ کی قیادت فاطمہ ثنا کو سونپی گئی ہے جنہوں نے ٹورنامنٹ میں اپنی قائدانہ صلاحیتوں کی بدولت پاکستان ویمنز ٹیم کو تمام پانچوں میچوں میں کامیابی دلواکر ورلڈکپ کے لئے کوالیفائی کروانے میں اہم کردار ادا کیا۔
یاد رہے کہ فاطمہ ثنا نے نہ صرف بطور کپتان بروقت فیصلے لے کر جیت میں اہم کردار ادا کیا بلکہ ٹورنامنٹ میں ان کی بطور آل راو¿نڈر کارکردگی بھی بہترین رہی، انہوں نے ٹورنامنٹ میں مجموعی طور پر 103 رنز بنائے اور 12 وکٹیں حاصل کیں۔
آئی سی سی کے مطابق فاطمہ ثنا پاکستان کے لئے ٹورنامنٹ کے دوران ایک اہم کھلاڑی ثابت ہوئیں، جنہوں نے نہ صرف بیٹنگ میں رنز بنائے بلکہ باو¿لنگ کے شعبے میں اہم موقع پر ٹیم کے لئے وکٹیں حاصل کیں۔
ویمنز کرکٹ ورلڈکپ کوالیفائر 2025 کی ٹیم آف دی ٹورنامنٹ میں فاطمہ ثنا کے علاوہ قومی ٹیم کے دیگر کھلاڑیوں میں منیبہ علی، نشتہ سندھو اور سعدیہ اقبال شامل ہیں۔اسی طرح بنگلہ دیش کی شرمین اختر اور نگار سلطانہ، ویسٹ انڈیز کی ہیلے میتھیوز، عالیہ علین اور شنیل ہنری ٹیم میں شامل ہیں، سکاٹ لینڈ کیتھرین برائس اور کیتھرین فریزر بھی ٹیم کا حصہ ہیں جبکہ بنگلہ دیش کی رابعہ خان کو ریزرو کھلاڑی کے طور پر منتخب کیا گیا ہے۔