نارووال میں لڑکیوں سے زیادتی کے 2 ملزم پولیس مقابلے میں ہلاک 

نارووال(ڈیلی پاکستان آن لائن ) نارووال میں لڑکیوں سے زیادتی کے 2 ملزمان پولیس مقابلے میں ہلاک ہوگئے جبکہ دیگر کو گرفتار کرلیا گیا۔
نجی ٹی وی" ایکسپریس نیوز" کے مطابق خواتین کے ساتھ بدسلوکی اور زیادتی کی ویڈیو بنا کر بلیک میل کرنے والے دو ملزمان اپنے ہی نامعلوم ساتھیوں کی فائرنگ سے ہلاک ہوگئے۔پولیس کے مطابق پولیس تھانہ ندوکے کی ٹیم گرفتار 2 ملزمان زبیر عرف زوہیب اور ماجد کو دیگر ملزمان کی گرفتاری کے لئے لے کر جا رہی تھی کہ نہر کی پٹڑی کے قریب پہنچنے پر پانچ نامعلوم ملزمان نے پولیس پارٹی پر فائرنگ کردی۔
پولیس نے جوابی فائرنگ کی، اسی دوران دو ملزمان ماجد اور زبیر نامعلوم ملزمان کی فائرنگ سے ہلاک ہوگئے۔پولیس کے مطابق دونوں ملزمان خواتین کے ساتھ ہراسگی، زیادتی اور ڈکیتی کے مقدمات میں ملوث اور ریکارڈ یافتہ تھے۔ 
دریں اثنا ءترجمان نارووال پولیس کے مطابق پولیس نے نہر کی پٹڑی پر خواتین کے ساتھ بدسلوکی اور نازیبا حرکات میں ملوث مزید چند ملزمان کو بھی گرفتار کیا ہے۔تھانہ ندوکے میں اطلاع موصول ہوئی تھی کہ نہر کی پٹڑی پر کچھ اوباش لڑکے خواتین کے ساتھ بدسلوکی کرتے ہیں، نازیبا حرکات کرتے ہیں، ان کی ویڈیوز بناتے ہیں اور بلیک میل کرتے ہیں۔نہر کنارے سیر و تفریح کے لئے جانے والی فیملیز کو ہراساں کیا جارہا ہے، نازیبا ویڈیو بنانے والا گروہ مبینہ طورپر 10 سے زائد نوجوان لڑکیوں، خواتین کو ہراساں کرچکا ہے اور نازیبا ویڈیو بنا کر اڑھائی لاکھ روپے وصول کرچکا ہے۔
وزیر اعلی پنجاب مریم نواز  کے احکامات تحت نارووال پولیس نے یہ کارروائی کی۔ پولیس نے متعدد مرکزی ملزمان کو گرفتار کرلیا۔