کورونا وائرس کا مقابلہ کرنے کے لیے امریکہ نے پنجاب کو 46وینٹی لیٹرز فراہم کردئیے 

لاہور(ڈیلی پاکستان آن لائن )امریکی حکومت اور نیشنل ڈیزاسٹر مینجمنٹ کے درمیان جاری شراکت داری کے تحت اور حکومت پنجاب کے اسپیشلائزڈ ہیلتھ کیئر اور میڈیکل ایجوکیشن ڈیپارٹمنٹ کے تعاون سے امریکی خصوصی ایجنسی برائے بین الاقوامی ترقی (یو ایس ایڈ )نے کورونا وائرس سے لڑنے کے لیے پنجاب کے 13ہسپتالوں میں 46وینٹی لیٹر فراہم کر دئیے ۔امریکہ کی طرف سے دئیے گئے یہ وینٹی لیٹر ان 200وینٹی لیٹرز کا حصہ ہیں جو امریکہ نے پاکستان کو دینے ہیں ۔ ان وینٹیلیٹرز کی فراہمی این ڈی ایم اے اور کیمونکس کی شراکت کے ذریعے کی گئی۔
 امریکی قونصل جنرل کیتھرین روڈریگ نے کہا یہ وینٹی لیٹرز محکمہ صحت پنجاب کی صلاحیت میں اضافہ کرکے نہ صرف کوویڈ 19 کے وبا پر پاکستان کے مجموعی ردعمل میں معاون ثابت ہوں گے بلکہ اس وبائی بیماری سے قیمتی جانیں بچانے میں بھی مدد فراہم کریں گے۔ ان کا کہنا تھا کہ ہم این ڈی ایم اے ، وزارت صحت اور محکمہ صحت پنجاب کی اس حمایت اور قیادت پر شکریہ ادا کرتے ہیں۔
پاکستانی محکمہ صحت کے حکام ، معالجین اور طبی پروفیسرز کے ساتھ شراکت میں ، یو ایس ایڈ نے ضرورت مند مریضوں کی مدد کے لئے آلات کو چلانے کے لئے 142 ڈاکٹروں اور پیرا میڈیکس کی تربیت کی مالی اعانت بھی فراہم کی۔پاکستان امریکہ شراکت داری پورے ملک میں لیبارٹری ٹیسٹنگ ، بیماریوں کی نگرانی ، کیس سے باخبر رہنے ، انفیکشن کی روک تھام اور کنٹرول ، اور مریضوں کی دیکھ بھال کو بہتر بنانے اور بڑھانے میں معاون ہے۔