بھارتی فوج کے کمانڈرز کی جانب سے پاک فوج کی پیشہ وارانہ مہارت کا اعتراف
راولپنڈی (ڈیلی پاکستان آن لائن) پاک فوج کے شعبہ تعلقات عامہ کے مطابق بھارتی کمانڈرز کی جانب سے پاکستانی امن فوجیوں کی پیشہ ورانہ مہارت کا اعتراف کیا گیا ہے۔
آئی ایس پی آر کے مطابق پاکستانی امن دستہ جنوبی سوڈان میں امن اور سلامتی برقرار رکھنے کیلئے فرض کی ادائیگی میں مصروف ہے، بلیو ہیلمٹ میں پاکستانی امن دستہ کے ارکان نے سول آبادی کے تحفظ کیلئے پیچیدہ ماحول میں مشکل انجینئرنگ ٹاسک مکمل کئے۔پاک فوج کے شعبہ تعلقات عامہ کے مطابق سول آبادی کا تحفظ امن مشن میں ہمیشہ پاکستانی امن دستوں کی اولین ترجیح رہی ہے، پاکستانی امن دستوں کے اہلکار دن رات سیلاب سے متاثرہ علاقوں میں اڑھائی لاکھ بے گھر افراد کی خدمت میں مصروف ہیں۔آئی ایس پی آر کے مطابق یو این مشن کے فورس کمانڈر بھارت کے لیفٹیننٹ جنرل ایس موہن نے پاکستانی امن دستے کی پیشہ ورانہ مہارت کا اعتراف کیا۔ لیفٹیننٹ جنرل ایس موہن نے آرمی چیف جنرل سید عاصم منیر کو خط میں پیشہ وارانہ خدمات کا اعتراف کیا، خط میں بھارتی آرمی آفیسر نے پاکستانی امن فوجیوں کی پیشہ وارانہ مہارت، لگن اور غیر متزلزل عزم کو سراہا۔پاک فوج کے شعبہ تعلقات عامہ کے مطابق بھارتی جنرل آفیسر نے بریگیڈیئر شفقت اقبال کے بطور سیکٹر کمانڈر اور لیفٹیننٹ کرنل شہباز اسلم کے بطور کمانڈنگ آفیسر کے کردار کو خصوصی طور پر سراہا۔آئی ایس پی آر کے مطابق فورس کمانڈر کا اعتراف عالمی امن کوششوں میں پاک فوج کی ساکھ اور قابل اعتماد شراکت دار کا ثبوت ہے، پاکستان اقوام متحدہ امن مشنز میں عالمی برادری کے ایک ذمہ دار رکن کے طور پر اہم کردار ادا کرنے کیلئے پرعزم ہے۔
