عدالت نے ماریہ کو قتل کرنے والے باپ اور بھائی کو سخت سزا سنا دی
لاہور (ڈیلی پاکستان آن لائن ) عدالت نے ماریہ بی بی قتل کیس کا محفوظ فیصلہ سناتے ہوئے باپ عبدالستار اور بیٹے محمد فیصل کو سزائے موت کی سزا سنا دی ۔
تفصیلات کے مطابق ایڈیشنل ڈسٹرکٹ اینڈ سیشن جج عبدالحفیظ بھٹہ نے ماریہ بی بی قتل کیس کا محفوظ فیصلہ سنا یا ۔ عدالت نے مرکزی ملزم محمد فیصل اور عبدالستار کو سزائے موت کے ساتھ 10 لاکھ روپے جرمانے کی سزا سنائی ہے ۔
یاد رہے کہ سوشل میڈیا پر ایک ویڈیو وائرل ہوئی تھی جس میں باپ نے اپنے بیٹے کے ہاتھوں بیٹی کا قتل کروایا جبکہ اس دوران پانی بھی پیتے رہے ، لڑکی کا بھائی شہباز معاملے کی ویڈیو بناتا رہا جو کہ قتل کے 4 روز بعد سوشل میڈیا پر وائرل ہوئی۔
ویڈیو وائرل ہونے پر تفصیلات منظر عام پر آئی جس کے بعد پولیس نے مقدمہ درج کرتے ہوئے تحقیقات کا آغاز کیا ۔ بھائی فیصل اور والد عبدالستار نے ماریہ کو قتل کر کے بعد تدفین بھی کر دی تھی اور موت کو طبعی قرار دیا تھا ۔
