مقبوضہ کشمیر  میں پرتشدد مظاہرے، 4 افراد ہلاک،متعدد زخمی ، بی جے پی کے دفتر کو آگ لگا دی گئی 

لداخ ( مانیٹرنگ ڈیسک ) مقبوضہ کشمیر کے علاقے لداخ کو ریاستی حیثیت دینےکے مطالبے پر ہونے والا احتجاج پرتشدد رنگ اختیار کرگیا۔

’’جیو نیوز ‘‘ کے مطابق  سڑکوں پر احتجاج کرتے مشتعل مظاہرین اور پولیس کے درمیان جھڑپوں میں  پولیس نے لاٹھی چارج اور  آنسو گیس کی  شیلنگ کی، پولیس کے ساتھ جھڑپوں میں 4 افراد ہلاک جبکہ 50 سے زائد زخمی ہوگئے۔

بھارتی خبر رساں ادارے ’’اے این آئی‘‘ کے مطابق لیہہ شہر میں بھارتیہ جنتا پارٹی (بی جے پی) کے دفتر کو مظاہرین نے توڑ پھوڑ کے بعد آگ لگا دی۔ واقعے کی ویڈیو میں دفتر کی عمارت کے عقب سے دھوئیں کے بادل اٹھتے دکھائی دیئے جبکہ سیکڑوں مظاہرین نعرے لگا رہے تھے۔ بھارتی ٹی وی چینلز نے پولیس کی ایک گاڑی کو بھی شعلوں کی لپیٹ میں دکھایا۔

 مظاہرین نے اعلان کیا ہے کہ  ریاستی حیثیت اور آئینی تحفظ کی بحالی تک احتجاج جاری رہے گا۔