پنجاب چیریٹی کمیشن اور سول ڈیفنس پنجاب کے زیر اہتمام نوجوانوں کیلیے قومی امن میلہ کا انعقاد

لاہور ( ڈیلی پاکستان آن لائن )محکمہ داخلہ پنجاب 10 لاکھ نوجوانوں کو پنجاب سول ڈیفنس ریزیلئنس کور کا حصہ بنانے کا مشن پر گامزن ہے۔ اسی سلسلے میں پنجاب چیریٹی کمیشن اور سول ڈیفنس پنجاب کے زیر اہتمام قومی امن میلہ برائے نوجوانان 2025 کا انعقاد کیا گیا۔ دو روزہ امن فیسٹیول میں طلباء، نوجوانوں، سول سوسائٹی اور متعلقہ تنظیموں نے بھرپور انداز میں شرکت کی۔ ڈائریکٹر سول ڈیفنس نے نوجوانوں کو پنجاب سول ڈیفنس ریزیلئنس کور میں شمولیت کی دعوت دی اور حالیہ سیلاب اور قبل ازیں پاک ،بھارت کشیدگی کے دوران سول ڈیفنس کے کردار پر روشنی ڈالی۔

فیسٹیول سے خطاب میں چیف ایگزیکٹو آفیسر پنجاب چیریٹی کمیشن کرنل شہزاد عامر نے کہا کہ قدرتی آفات یا ہنگامی حالات میں حکومت کے شانہ بشانہ سول سوسائٹی کا کردار نہایت اہمیت کا حامل ہے ۔ہنگامی حالات سے بطریق احسن نمٹنے کیلئے محکمہ داخلہ پنجاب سول ڈیفنس کو جدید آلات اور تربیت کی مدد سے اپگریڈ کر رہا ہے۔ پنجاب چیریٹی کمیشن صوبے میں معتبر اور ذمہ دار این جی اوز کی معاونت اور رہنمائی کر رہا ہے۔ حکومت اور سول سوسائٹی کے مابین مضبوط شراکت داری پائیدار ترقی اور کمیونٹی امپاورمنٹ کی ضامن ہے۔

ڈائریکٹر سول ڈیفنس تسنیم علی خاں نے فیسٹیول سے خطاب میں بتایا کہ کسی بھی ہنگامی صورتحال میں سول ڈیفنس اپنے ہم وطنوں کی امداد کیلئے ہراول دستے کا کردار ادا کرتا ہے۔  امن، سماجی استحکام اور رضاکارانہ خدمات کے فروغ میں نوجوانوں کا کلیدی کردار ہے۔

انہوں نے حاضرین کو دعوت دی کہ بطور رضاکار رجسٹریشن کروا کر ملک و قوم کی خدمت کے مشن کا حصہ بنیں۔ ڈائریکٹر سول ڈیفنس پنجاب نے بتایا کہ 3 ہفتوں میں 14 ہزار افراد نے بطور سول ڈیفنس رضاکار رجسٹریشن کروائی ہے جو نہایت خوش آئیند ہے۔  سول ڈیفنس کو جدید خطوط پر استوار کرنے کیلئے 500 ملین سے جدید آلات لیے گئے۔

 انہوں نے بتایا کہ سول ڈیفنس میں بطور رضاکار رجسٹریشن کیلئے آن لائن پورٹل کھلا ہے۔ چانن ڈویلپمنٹ ایسوسی ایشن کے تعاون سے منعقدہ 2 روزہ نیشنل یوتھ پیس فیسٹیول میں ملک بھر سے 500 سے زائد نوجوانوں نے حصہ لیا۔