نہریں نکالنے کا معاملہ: وکلا ءکے دھرنے جاری، سندھ اور پنجاب کے درمیان گڈز ٹرانسپورٹ بند
سکھر(ڈیلی پاکستان آن لائن )دریائے سندھ سے نہریں نکالنے کے منصوبے کے خلاف سندھ میں مختلف مقامات پر وکلاء کے دھرنے جاری ہیں۔
نجی ٹی وی" جیو نیوز" کے مطابق دریائے سندھ سے نہریں نکالنے کے منصوبے کے خلاف خیر پور میں ببرلو بائی پاس پر وکلاء کا دھرنا دسویں روز میں داخل ہوگیا ہے۔ببرلو بائی پاس سمیت دیگر مقامات پر جاری دھرنوں کے باعث سندھ اور پنجاب کے درمیان گڈز ٹرانسپورٹ مکمل بند ہے جس کی وجہ سے اشیائے خورونوش اور دیگر اشیاء کے ٹرک اور ٹرالر پھنس گئے۔
اس حوالے سے ٹرانسپورٹرز کا کہنا ہے کہ شدید گرمی کے باعث مشکلات کا سامنا ہے جبکہ گاڑیوں میں موجود سامان بھی خراب ہونے لگا ہے۔دوسری جانب وزیرداخلہ سندھ ضیا ءالحسن لنجار نے ببرلو بائی پاس پر دھرنا ختم کرنےکی درخواست کرتے ہوئے کہا کہ پورے ملک کے لوگوں کو دھرنے کے باعث پریشانی کا سامنا ہے۔
وزیرداخلہ سندھ کا مزید کہنا تھا کہ دھر نے کے شرکاء پرطاقت کے استعمال کاکوئی آپشن زیرغورنہیں ہے۔
