ای سی سی نے پنشن سکیم میں ترامیم کی منظوری دے دی
اسلام آباد (ڈیلی پاکستان آن لائن) اقتصادی رابطہ کمیٹی (ای سی سی) نے پے اینڈ پنشن کمیشن کی سفارشات پر پنشن سکیم میں ترامیم کی منظوری دے دی ۔
وفاقی وزیر خزانہ سینیٹر محمد اورنگزیب کی زیر صدارت اقتصادی رابطہ کمیٹی کا اجلاس ہوا، ای سی سی نے پنشن سکیم میں ترامیم یکم جولائی 2024 سے لاگو کرنے کی سفارش کی، اجلاس میں فیصلہ کیا گیا کہ یکم جولائی سے آنے والے نئے ملازمین کے لیے کنٹری بیوٹری پنشن سکیم متعارف کرائی جائے گی۔موجودہ پنشنرز کے لیے بھی نئے رولز متعارف کرائے جائیں گے۔ای سی سی نے موجودہ پنشنرز کے لیے پنشن فنڈ قائم کرنے کا فیصلہ کیا۔ اجلاس میں فیصلہ کیا گیا کہ پنشن فنڈز کے لیے رولز وفاقی حکومت بنائے گی، اے سی سی نے مختلف وزارتوں کے لیے سپلیمنٹری گرانٹس کی بھی منظوری دی۔
